Qarabaq ýnıversıtetinde VII jazǵy túrkologııa mektebi jumysyn bastady
ASTANA. KAZINFORM – Ázerbaıjannyń Hankendi qalasyndaǵy Qarabaq ýnıversıtetinde Túrki memleketteriniń VII jazǵy túrkologııa mektebiniń ashylý rásimi ótti. Oǵan Ázerbaıjan, Qazaqstan, Qyrǵyzstan, Ózbekstan, Túrkııa, Soltústik Kıpr Túrik Respýblıkasy, Iran, Mońǵolııa jáne Soltústik Makedonııanyń jas ǵalymdary qatysyp jatyr.
Jazǵy mektep jas túrkolog ǵalymdardyń akademııalyq áleýetin arttyrýǵa, túrli elderden kelgen qatysýshylar arasynda bilim men tájirıbe almasýǵa, sondaı-aq zamanaýı ǵylymı tásilder men qoldanbaly zertteý ádisterin meńgerýge múmkindik jasaýǵa baǵyttalǵan.
Bul úshin 30-ǵa jýyq ǵylym doktory men postdoktoranttar Ázerbaıjan, Túrkııa, Qazaqstan, Qyrǵyzstan jáne Ózbekstannan shaqyrylǵan halyqaralyq tájirıbesi bar ǵalymdar men mamandardyń jetekshiligimen bilim alady.
Apta boıy qatysýshylar ǵylymı maqala daıyndaý, prezentatsııalar jasaý jáne zertteý granttaryn tıimdi paıdalaný baǵyttarynda biliktilikterin arttyryp, túrki memleketteriniń tarıhy, túrki áleminiń arheologııasy, túrki halyqtarynyń ózara qatynastary, óner men fılosofııalyq oı tarıhy, sondaı-aq túrki dıalektileri men ádebıetteri jónindegi taqyryptardy zerdeleıdi.
Ashylý rásiminde sóz sóılegen Túrki Akademııasynyń basshysy Shahın Mustafaev Qarabaqtyń tarıhı mańyzyn atap ótip, akademııanyń túrki áleminiń ǵylymı jáne mádenı murasyn saqtaý, damytý baǵytynda qyzmet atqaratynyn jetkizdi. Sondaı-aq, ol jazǵy mekteptiń tek bilim almasý alańy ǵana emes, jas ǵalymdar arasyndaǵy dostyq baılanystardy nyǵaıtýdyń mańyzdy quraly ekenin atap ótti.
Dárister men semınarlardan bólek, qatysýshylar shyǵarmashylyq is-sharalarǵa qatysyp, Hankendi jáne Shýsha qalalarynyń tarıhı jáne mádenı murasymen tanysý múmkindigine ıe bolady.
Aıta ketelik Túrkııanyń 100 stýdenti Arızona dıplomyn Qazaqstanda alatyny týraly jazǵan edik.