«Qara jumada» árbir amerıkalyq qansha aqsha jumsady
ASTANA. QazAqparat -AQSh azamattary jappaı satylymdar kezinde qyrýar aqshaǵa taýar satyp aldy. Rızashylyq kúni men «qara jumada» onlaın satylymdardyń kólemi rekordtyq kórsetkishke jetip, 7,9 mlrd dollardy qurady.
Bul ótken jylmen salystyrǵanda, 17,9 paıyzǵa artyq, dep habarlaıdy QazAqparat Reuters agenttigine silteme jasap.
«Salesforce» marketıngtik kompanııanyń málimetine sáıkes, ortasha eseppen árbir adam 122 dollarǵa shyǵyndaldy. Al «Adobe»-tyń aqparaty boıynsha atalǵan kórsetkish 135 dollarǵa deıin jetken. Eki kúnniń ishinde amerıkalyqtar 7,9 mlrd dollarǵa onlaın saýda jasasa, bir ǵana «qara jumada» 5,03 mlrd-ty jumsaǵan. Bunyń ózi jappaı satylymdar tarıhyndaǵy eń úlken soma bolyp sanalady. Amerıkalyqtar PlayStation 4, teledıdar, oıynshyqtar men noýtbýkterdi kóptep alǵan.
Aıta keteıik, AQSh-ta jyl saıyn «qara jumada» jappaı satylymdar ótedi. Sol kezde taýarlardy eki ese arzanǵa alýǵa múmkindik bar. «Qara juma» Rızashylyq kúninen keıin uıymdastyrylady. Bıyl jappaı satylymdar 23-24 qarasha kúnderi boldy.
