«Qara jorǵa» bılep tanymal bolǵan jylqy Pavlodarda óner kórsetedi
ASTANA. QazAqparat - «Qara jorǵa» bıin bılep áleýmettik jelide tanymal bolǵan kókshetaýlyq jylqy Pavlodarda Naýryz merekesiniń sońǵy kúni, 30-sáýirde óner kórsetedi, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken brıfıng barysynda oblystyq mádenıet, arhıvter jáne qujattama basqarmasynyń basshysy Ardaq Raıymbekov aıtty.
«30-sáýirde Ortalyq alańda Ulystyń uly kúni merekesiniń sońǵy kúni aýqymdy túrde atalyp ótedi. Bıyl da Naýryz 40 kún toılanatynyn bilesizder. Kóptegen shara ótedi. Kókshetaýda qara jorǵa bıin bılegen jylqyny Pavlodarda tamashalaı alasyzdar. Shabandoz jurt aldynda tegin óner kórsetedi», - dep atap ótti Ardaq Raıymbekov.
Eske salaıyq, 30-sáýirde Naýryz merekesiniń qorytyndysy shyǵarylyp, ortalyq alańda 70 kıiz úı ornatylady. Kıiz úıler segiz aýylǵa bólinedi. Jeteýinde oblys turǵyndary men qonaqtaryna taǵamdardan dám taratylady. Shaǵyn sahnalarada teatrlandyrylǵan qoıylymdar men kontsertter, ulttyq oıyndar uıymdastyrylady. Ortalyq alańda jas sýretshiler men sheberlerdiń uıymdastyrýymen ulttyq dástúrden syr shertetin dekoratıvti «Taıqazan», «Sáýkele», «Bórik» sııaqty ınstallıatsııalar ornatylady. Eń ádemi ulttyq kıim kıgen pavlodarlyqtarǵa syılyqtar usynylady.
