«Qara jorǵa» bıiniń qımyldary sheteldikterdi tamsandyrdy

BEIJІŃ-HANOI. QazAqparat - Vetnam astanasy Hanoıda kóshpendilerdiń mádenıeti men dástúri, san ǵasyrlyq tarıhy, sondaı-aq qazaq pen qyrǵyz halyqtarynyń ulttyq taǵamdary kópshilikke tanystyryldy, dep habarlaıdy «QazAqparat» HAA Qytaıdaǵy tilshisi.

I am Nomad is-sharasyn Hanoı Azııa áıelderiniń klýby (Asian Woman and Friends in Hanoi Club) uıymdastyrdy. Oǵan sheteldik elshiler, Vetnamnyń iskerı áıelderi men Ońtústik-Shyǵys Azııa halyqtarynyń ókilderi qatysty.

Qonaqtarǵa Orta Azııanyń ǵajaıyp tabıǵatynan jáne onyń taǵylymy mol tarıhynan syr shertetin vıdeorolık kórsetildi. Jıynǵa qatysýshylardy kórmege qoıylǵan ulttyq zattar, aspaptar, qolóner buıymdary kóbirek qyzyqtyrdy.

Qyrǵyzstannyń ókili Regına Gatına ataqty qyzǵyz kompozıtory Apaz Jaınakovtyń «Qyrǵyz jeri» ánin asqaqtata oryndady. Al qazaqstandyq stýdentter men dıplomattardyń áıelderi ulttyq kıimderin kıip, qazaqtyń qara dombyrasyn kúmbirletti. Kesh sońynda qazaqstandyqtar jınalǵandarǵa «Qara jorǵa» bıin bılep berdi. «Qara jorǵa» bıiniń qımyldary sheteldikterdiń tańdanysyn týdyrdy.

«Bul sharany uıymdastyrýdaǵy negizgi maqsatymyz Vetnamda turatyn bizdiń dostarymyzdy ulttyq qundylyqtarymyzben tanystyrý. Ókinishke oraı, Ońtústik-Shyǵys Azııa elderi biz týraly bile bermeıdi», - dedi Hanoı Azııa áıelderi klýbynyń prezıdenti Aıda Ishenalıeva.

Japonııadan kelgen qonaq Maıýmı Masýdo jıyndaǵy áserimen bólisti. «Men búgin Azııa elderiniń tarıhy men mádenıetiniń sheksizdigine, alýan túrliligine tántti boldym. Men ózim úshin jańa dúnıelerdi ashtym. Maǵan ásirese ulttyq án men bı qatty unady» ,- dedi ol.