Qara jáne tústi metall synyqtary men qaldyqtaryn elden áketýge tyıym salyndy

NUR-SULTAN. QazAqparat - Qara jáne tústi metaldardyń synyqtary men qaldyqtaryn elden áketýge tyıym salyndy, dep habarlaıdy QazAqparat.

Memlekettik kirister komıtetiniń málimetinshe, bıylǵy 6 mamyrdan bastap Qazaqstan aýmaǵynan qara jáne tústi metaldardyń synyqtary men qaldyqtaryn syrtqa áketýge tyıym salynady.

«Bul shekteý Indýstrııa jáne ınfraqurylymdyq damý mınıstriniń 2022 jylǵy 6 mamyrdan bastap kúshine enetin «Qara jáne tústi metaldardyń synyqtary men qaldyqtaryn tasymaldaýdyń keıbir máseleleri týraly» buıryǵymen belgilengen. Bul rette, buıryq qoldanysqa engizilgen kúnge deıin Qazaqstan men EAEO kedendik zańnamasyna sáıkes eksporttyń kedendik rásimi boıynsha ornalastyrylǵan jáne shyǵarylǵan taýarlar Qazaqstannyń aýmaǵynan kedergisiz áketýge jatatynyn habarlaımyz», - delingen habarlamada.