Qara zereniń emdik qasıetteri
ASTANA. QazAqparat - Qara zere (tmın) - adam aǵzasyn qalypqa keltirip, ımmýnıtetti kóterip, terdi tez shyǵaryp, ystyqty túsiretin emdik qasıeti mol ósimdik.
Sonymen qatar, qan qysymyn tómendetip, qaterli isik aýrýlarynyń aldyn alady jáne omyraýda balasy bar analardyń sútin kóbeıtip, garmondardyń durys bólinýin retteıtin qasıetke ıe.
Qara zereniń vırýsqa, qabynýǵa, túrli bakterııalarǵa qarsy jáne ishtegi qurttardy túsiretin, zár aıdaıtyn qasıetteri de bar. Emdik ósimdikten jasalǵan dárilerdi júkti áıelderge jáne aǵzadaǵy músheni (búırekti nemese ótti) alyp tastaǵan jaǵdaıda qabyldaýǵa bolmaıdy, dep jazady massaget.kz.
Nazarlaryńyzǵa qara zereniń emdik qasıetteri jóninde aqparat usynamyz.
Halyqtyq medıtsına qara zereden daıyndalǵan qospalar arqyly túrli derten aıyǵýǵa bolatynyn aıtady. Máselen:
- Bronhıt, demikpe, jótel aýrýlarynan aıyǵý úshin qara zıre maıyna (1/5) záıtún maıyn qosyp aralastyrady da, osy qospamen kókirekti maılaıdy jáne kúnine bir mezgil qara zere maıymen aýyz qýysyn býlaıdy.
- Qan qysymy qatty kóterilgende 1 shaı qasyq qara zere dánin 1 staqan shaıǵa qosyp aralasyryp ishedi. Sodan keıin samaı men moıyndy zere maıymen maılaıdy.
- Bas aýyrǵanda untaqtalǵan qara zere men báden dánin (anıs) jáne qalampyr (gvozdıka) gúlin teńdeı mólsherde aralastyryp, daıyn qospadan kúnige tańerteń jáne keshkisin 1 shaı qasyǵyn qaınaǵan sýmen qosyp qabyldaıdy. Taǵy bir tásil - qara zereni untaqtap 1 shaı qasyǵyn 3 as qasyq záıtún maıymen aralastyrady. Sodan soń súzgiden ótkizip, muryn qýysyna tamyzady.
- Súıek qaqsap aýyrǵanda 1 dana pııazdy úkkishten ótkizip qaınatady da, 1 shaı qasyq qara zere maıymen aralastyrady. Qospany kúnige 2 mezgil qabyldaıdy. Aýyrǵan jerge ósimdik maıyn jaǵady.
- Asqazan jarasynda 10 tamshy qara zere maıyn 1 staqan bal men 1 as qasyq keptirip untaqtalǵan anar qabyǵymen jaqsylap aralastyrady. Daıyn qospany kúnine ash qarynǵa 1 shaı qasyqtan 1 staqan sútpen qosyp ishedi. Emdik kýrsty 2 aı qabyldaıdy.
- Іshek qurty aýrýynan aıyǵý úshin 1 shaı qasyq qara zere men úkkishten ótkizilgen 3 tal sarymsaq jáne 1 aşy qyzyl burysh, untaqtalǵan 10 dana asqabaq dánegimen aralastyryp, ústinen 1 shaı qasyq záıtún maıyn quıyp aralastyrýdy jalǵastyrady. Daıyn qospany uıyqtar aldynda jep jatady da, tańerteń askók tunbasy nemese qaınatpasynan 1-2 urttam ishedi. Qara zere men alma sirkesýyn aralastyryp ishke jaǵady.
- Artrıt aýrýyna kúnige tańerteń jáne keshki astan 25 mınýt buryn 1 shaı qasyq qara zere maıyn ishedi. Artynsha ½ staqan sýǵa 1 as qasyq baldy aralastyryp ishý kerek.
- Teri aýrýlarynda kúnine 2-3 mezgil 1 shaı qasyq qara zere maıyn qabyldaıdy. Al terige 1,5 shaı qasyq qara zere maıyn 1 shaı qasyq záıtún maıymen aralastyryp jaǵady da 1 saǵattan soń sabyndap jýady.
- Qulaq aýrýynda 1-2 tamshy jyly qara zere maıyn qulaqqa tamyzady.
- Júrek qysylyp aýyrǵanda 1 staqan ystyq sútke 3 tamshy qara zere maıyn jáne 1 shaı qasyq bal qosyp aralastyryp ishedi.
- Este saqtaý qabiletin jaqsartý úshin 1 shaı qasyq jalbyzdy 1 staqan sýǵa salyp bir qaınatady da súzgiden ótkizip, 1 shaı qasyq bal jáne 7 tamshy qara zere maıyn tamyzyp aralastyrady. Daıyn qospany kúnige 1 mezgil ishedi.
