Qara ýyldyryqty shekara asyrmaq bolǵan azamat quryqtaldy
ASTANA. 15 qańtar. QazAqparat - Bir táýliktiń ishinde qazaqstandyq shekarashylar qara ýyldyryq, halyq tutynatyn taýarlar jáne qus eti sekildi ónimderdi zańsyz ótkizýge tyrysqan azamattardyń jolyn kesti. Bul týraly QR UQK ShQ baspasóz qyzmetinen habarlady.
Qordaı shekara otrıadyna qarasty «Ótegen» ótkizý-baqylaý beketiniń narıady qyrǵyz elinen kele jatqan jalpy salmaǵy 3,5 tsentner bolatyn 17 qorap qus etin ustady. Shekarashylardy baıqap qalǵan beımálim adamdar kórshiles memlekettiń aýmaǵyna qaraı qasha jóneldi. Osy kúni «Qordaı avto» ótkizý-baqylaý beketiniń shekarashylary «Toıota-grand haıs» avtomashınasymen jalpy salmaǵy bir tonnaǵa jýyq zattardy zańsyz alyp kele jatqan qyrǵyz eliniń azamatyn ustady. Oral shekara otrıadyna qarasty «Álimbet avto» ótkizý-baqylaý beketiniń shekarashylary Reseı jerine zańsyz ótkizilmek bolǵan 3 kılogramm qara ýyldyryqty ustady, qunyn eseptegende aldyn ala baǵa boıynsha 500 000 teńgeni qurady. Al ýyldyryqty atalǵan azamat «Lada» avtokóliginiń artqy esiginiń japsyrmasyna jasyryp alyp ótpek bolǵan. Atalǵan derekter boıynsha quqyqqorǵaý organdary habarlandyrylyp, fıltratsııalyq is-sharalar atqarylýda.
