«Qara tizimge» ilikken Azamattyq avıatsııa komıteti qyzmetkerlerin qaıta túgendedi
ASTANA. 2 qazan. QazAqparat - QR KKM Azamattyq avıatsııa komıteti osy saladaǵy baqylaý-qadaǵalaý fýnktsııalaryn atqarýshy basqarmalardyń bos oryndaryna ornalasýǵa jarııalanǵan konkýrstardyń nátıjesinde avıatsııalyq bilimi bar jáne salada qyzmet atqarǵan edáýir tájirıbesi bar mamandarmen tolyqtaı tolyqtyryldy. Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Aıtalyq, Eýropalyq avıatsııalyq standarttarmen jumys atqarǵan tájirıbesi bar, qajetti kýrstardan ótken jáne tıisti sertıfıkattar alǵan ushqyshtar, ushýdyń radıotehnıkalyq jaǵdaıyn qamtamasyz etý jáne ushý jaramdylyǵy jónindegi ınjenerler qabyldandy.
Nátıjesinde 40 kásibı ınspektor avıakólikte baqylaý jasaıtyn bolady. Olardyń quzyretine avıakompanııalardy, áýe kemelerin, áýejaılardy, navıgatsııa nysandaryn, oqytý ortalyqtaryn jáne ekıpaj músheleri men ınjenerlerdiń biliktilik deńgeıin tekserý kiredi.
Bas sarapshy-ushý paıdalaný basqarmasynyń memlekettik ınspektory bolyp Toty Ámirova taǵaıyndaldy. Ol - 13 jyl eńbek ótili bar, qazir de ushqysh, TMD-daǵy Boing-737, Airbus-320 áýe kemeleriniń alǵashqy áıel-komandıri.
Qabyldanǵan mamandardyń arasynda tájirıbeli ushqyshtar Igor Petıashın, Sergeı Vetreşak, Ǵazız Shilikbaev jáne basqalar bar. Olardyń saladaǵy jumys tájirıbesi 25-30 jyldan kem emes, olar sonymen birge ınspektor jáne ınstrýktorlardyń da qyzmetin atqarady.
Azamattyq avıatsııa komıteti qyzmetkerleriniń sanynyń azdyǵy men avıakólikti qadaǵalaıtyn mamandardyń biliktiliginiń tómendigine baılanysty Qazaqstannyń atyshýly «qara tizimge» iligýi IKAO-nyń 2009 jylǵy aýdıt eskertpeleriniń biri bolǵandyǵyn eske salamyz.
