Qara teńizdegi munaı tankerlerine dron shabýyly – QR SІM málimdeme jasady
ASTANA. KAZINFORM — Qazaqstan Respýblıkasy Syrtqy ister mınıstrliginiń resmı ókili Erlan Jetibaev Qara teńizdegi munaı tankerlermen baılanysty oqıǵaǵa qatysty málimdeme jasady.
Qazaqstan Respýblıkasynyń Syrtqy ister mınıstrligi 13 qańtarda Qara teńizde bolǵan oqıǵaǵa baılanysty alańdaýshylyq bildirdi. Atalǵan kúni Kaspıı qubyry konsortsıýmynyń teńiz termınalyna baǵyt alǵan úsh munaı tankerine ushqyshsyz ushý apparattary arqyly shabýyl jasalǵan.
Syrtqy ister mınıstrliginiń resmı ókiliniń sózinshe, osyǵan baılanysty Qazaqstan tarapy birqatar eýropalyq eldiń elshilerimen shuǵyl kezdesýler ótkizdi, sondaı-aq AQSh jáne basqa da sheteldik seriktestermen baılanys ornatty. Kezdesýler barysynda halyqaralyq quqyq talaptaryn saqtaı otyryp, kómirsýtegin tasymaldaý, ásirese teńiz joldaryndaǵy qaýipsizdikti qamtamasyz etý sharalarynyń mańyzdylyǵy atap ótildi.
— Syrtqy ister mınıstrligi Qazaqstannyń eshqandaı qarýly qaqtyǵysqa qatysy joq ekenin jáne jahandyq ári eýropalyq energetıkalyq qaýipsizdikti qamtamasyz etýge turaqty úles qosyp kele jatqanyn atap ótti. Sondaı-aq el energııa resýrstaryn halyqaralyq talaptarǵa saı, úzdiksiz jetkizip otyrǵanyn málim etti. Osy turǵyda atalǵan tankerlerdiń barlyq qajetti ruqsattary bolǵany jáne tıisti sáıkestendirý jabdyqtarymen qamtamasyz etilgeni aıtyldy. Mınıstrlik sońǵy ýaqytta mundaı oqıǵalardyń jıilep bara jatqanyn atap ótip, bul halyqaralyq energetıkalyq ınfraqurylymnyń turaqty jumysyna qaýip tóndiretinin eskertti. Osyǵan baılanysty Qazaqstan seriktesterin osyndaı jaǵdaılardyń aldyn alý úshin birlesken sharalar ázirleýge jáne tyǵyz yntymaqtastyq ornatýǵa shaqyrady, — dedi Erlan Jetibaev.
Budan buryn Qazaqstannyń Energetıka mınıstrligi Kaspıı qubyr konsortsıýmy teńiz termınaly mańynda Qazaqstannyń eksporttyq munaıyn tasymaldaýǵa qatysqan eki kemede tirkelgen keleńsiz oqıǵalar týraly aqparatty resmı túrde rastady.
Sonymen qatar «QazMunaıGaz» UQ» AQ ókilderi Kaspıı qubyr konsortsıýmynyń termınalyndaǵy tankermen bolǵan oqıǵaǵa qatysty aqparattyq habarlama taratty.