Qara teńizde bortynda 55 adam bolǵan keme aýdaryldy
KRASNODAR. QazAqparat - Qara teńiz alabyna jatatyn Djýbga ózeniniń teńizge quıar saǵasynda jumaǵa qaraǵan túnde aýdarylyp ketken kemeniń bortynda 55 adam bolǵan. Bul týraly Týapsın aýdanynyń basshysy Anatolıı Rýsınge silteme jasap, TASS agenttigi habarlady.
«Polıtsııanyń anyqtaýynsha, apatqa ushyraǵan katamarannyń bortynda 55 adam bolǵan, sonyń 15-i - bala», - deıdi Rýsın. Qutqarylǵandardyń eshbiri medıtsınalyq kómekke zárý bolmaǵan.
Onyń sózine qaraǵanda, oqys oqıǵa jaǵajaı aýmaǵynda bolmaǵan. «Ol teńiz saıahaty edi, jaǵajaıdyń aýmaǵy qorshalmaǵan», - deıdi ol.
Keleńsiz jaǵdaı juma kúni keshkisin bolǵan. Apat saldarynan eki adam qaza tapty. Oqıǵa boıynsha qylmystyq is qozǵalyp, kemeniń ıesi men kapıtan ustaldy.
