Qara sómkemen esirtki taratý ásirese jastar arasynda tıimdi bızneske aınaldy – Erbolat Dosaev

ALMATY. QazAqparat- Almatyda esirtkiniń taralýyna qarsy kúres sharalary kúsheıtilip jatyr. Bul týraly qala ákimi Erbolat Dosaev Túrksib aýdany turǵyndarymen kezdesýinde aıtty, dep habarlaıdy QazAqparat tilshisi.

Kezdesý barysyndaTúrksib aýdanynyń turǵyny esirtki jarnamasyna qatysty másele kóterdi.

«Bizdiń aýdanda esirtki jarnamasyna silteme qoıylatyn kóptegen oryn bar. Shara qoldanýdy suraımyn, múmkin osy jarnamamen jáne esirtki satýmen aınalysatyndardy baqylaý jáne jazalaý úshin vıdeobaqylaý ornatý kerek shyǵar»,- dedi aýdan turǵyny.

Almaty ákimi Erbolat Dosaev esirtki men nashaqorlyqtyń ásirese jastar arasynda keń taraǵanyn, bul - kún tártibindegi ózekti máseleniń biri ekenin atap ótti.

«Búginde, ókinishke qaraı, bul jastar úshin tıimdi bızneske aınaldy. Jarnama arqyly qara sómkelerdi jetkizýmen aınalysady. Biz olardy ustaımyz, ákimshilik aıyppul salamyz. Bul Túrksib aýdanynyń ǵana emes, qala boıynsha ózekti másele bolyp tur. Aýdan ákimderimen jáne qalalyq polıtsııa departamentimen birlesip qazir úlken jumys atqardyq. Sonymen qatar bizge kómektesetin túrli uıymdardy tarta otyryp, «Narkostop» baǵdarlamasy kórsetildi. Úkimettik emes uıymdar osy jarnamalardy joıýǵa kómektesedi»,-dedi Almaty ákimi.

Sonymen qatar, ol esirtki tasymaldaýshylar oryndaryn únemi ózgertip otyratynyn tilge tıek etti.

«Sondyqtan aýdan ákimine tapsyrma beremin. Qosymsha 585 kamera ornatylady», – dedi qala ákimi.