Qara shaıǵa nan batyryp jeıdi: Almaty balabaqshasyn komıssııa tekseretin boldy
ALMATY. QazAqparat – Almaty qalasyndaǵy balabaqshalardyń birinde balalarǵa sapasyz tamaq beriletini týraly vıdeo jelige tarady, dep habarlaıdy QazAqparat tilshisi.
Vıdeo avtorynyń aıtýynsha, sapasyz tamaq beretin balabaqsha «memlekettik» bolyp tabylady.
«Munda balalar qara shaıǵa nandy salyp ishedi. Nege óz balalaryna mundaı tamaq bermeıdi», - dep shaǵymdandy vıdeo avtory. Sondaı-aq vıdeo astyndaǵy jazbada bul qaladaǵy №164 memlekettik balabaqsha ekeni jazylǵan.
Atalǵan máselege baılanysty Almaty qalasynyń Bilim basqarmasy túsinik berdi.
«№164 bóbekjaı-balabaqshasy» memlekettik balabaqshasynda balalardy tamaqtandyrý sapasyz uıymdastyrylady degen kúdikke qatysty jan-jaqty tekserý júrgizý úshin monıtorıngilik top quryldy. 20 naýryzǵa deıin baqylaý komıssııasy óz jumysyn aıaqtaýy tıis. Qazir Almaty qalasy Bilim basqarmasynyń qyzmetkerleri mektepke deıingi uıymǵa ketti. Tekserý nátıjeleri qosymsha habarlanatyn bolady», - delinedi vedomstvo habarlamasynda.
