Qara órik pen nektarın baǵasy qansha
ASTANA. KAZINFORM – Elimizdiń qalalarynda qara órik pen nektarın baǵasynda edáýir aıyrmashylyq bar. Oǵan logıstıka men suranystyń áser etedi, dep habarlaıdy Kazinform agenttiginiń tilshisi.
Baǵadaǵy aıyrmashylyqqa birneshe faktordyń áseri bar. Birinshiden, óndirýshi men satyp alýshy arasyndaǵy araqashyqtyq, ıaǵnı logıstıka áser etedi. Óńir neǵurlym shalǵaı bolsa, jemis te soǵurlym qymbattaı beredi. Ekinshiden, ónimniń sapasy men maýsymdyq suranystyń áseri de bar.
Elimizdiń ońtústik óńirlerinde qara órik pen nektarın baǵasy tómen. Mundaǵy qolaıly klımattyń jáne aýyl sharýashylyǵy sektorynyń damý kórsetkishi oǵan áser etedi. Al elimizdiń ortalyǵyndaǵy qalalarda baǵa ortasha. Usynys pen suranys munda da teń. Al shyǵysynda, aýyl sharýashylyǵynyń osy salasy kenje qalyp, baǵa ózgelerge qaraǵanda joǵary bolyp tur.
Qara órik
Túrkistan qalasynda qara órik baǵasy 500 teńgeden bastalsa, Óskemen men Semeıde kelisi 1 300 teńgege jetip tur. Elimizdiń ońtústigindegi Túrkistan, Qyzylorda men Taraz qaralarynda qara óriktiń kelisi 500-900 teńgege satylyp jatyr. Munda aýyl sharýashylyǵy salasy jaqsy damyǵan, sáıkesinshe baǵa da ózgelerge qaraǵanda tómen. Jaqyn bolǵan soń jetkizý qyzmeti de baǵaǵa oń áser etip otyr. Al elimizdiń ortalyǵy men soltústiginde, onyń ishinde Astana, Almaty, Qaraǵandy, Qostanaıda baǵa orta eseppen alǵanda 700-1 000 teńge aralyǵynda.
Qara órik baǵasy elimizdiń shyǵysynda, atap kórseter bolsaq Óskemen, Semeıde joǵary. Bul qalalarda kelisi 1 300 teńgege satylyp jatyr. Sebebi barar jer shalǵaı, kólik tasymaly jemis qunynyń ósýine ákep soǵady.
Nektarın
Qazaqstan qalalarynda nektarın baǵasynda úlken aıyrmashylyq bar. Máselen Túrkistanda kelisi 700 teńge bolsa, Óskemen men Semeıde baǵa 1 700 teńge bolyp tur. Elimizdiń basym bóliginde baǵa 1300 teńgeden aspaıdy.
Taǵy bir qyzyqty jaıt. Elimizdiń batysyndaǵy Atyraý qalasynda nektarın kelisi 1 400 teńgege satylyp jatyr. Oǵan tasymal men suranys áser etýi múmkin. Degenmen Aqtóbe men Aqtaýda baǵa kóńilge qonymdy. Munda bir keli nektarın baǵasy – 850-890 teńge.
Buǵan deıin Qazaqstandaǵy rýkkola, asjapyraq, jalbyz ben kók jýa baǵasy týraly jazyldy.