Qara metallýrgııada eksporttyq áleýeti 3 mlrd dollarlyq jobalar iske qosylady
Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.
«2022 jyldyń negizgi jobalaryn atap ótsem. Olar: Atyraý oblysynda propılen óndiretin zaýyt salý; Qaraǵandy oblysynda avtomobıl shınalaryn jasaıtyn zaýyttyń qurylysy; Aqmola oblysyndaǵy altyn óndirý fabrıkasy men Túrkistan oblysynda munaı óńdeıtin zaýyttyń qurylysy. Sondaı-aq Shymkent qalasynda alıýmınıı bankilerin óndirý boıynsha joba iske qosylady. Sonymen birge Shyǵys Qazaqstan oblysynda - maı ekstraktsııalyq zaýyty; Jambyl oblysynda - mıneraldy tyńaıtqyshtar óndirisin keńeıtý josparlanýda. Almaty qalasynda alıýmınıı jáne bımetall radıatorlarynyń óndirisi iske qosylady», - dedi mınıstr.
Onyń atap ótýinshe, qara metallýrgııa salasyndaǵy aldyńǵy qatardaǵy jobalardyń tizimine 4 jańa bolat quıý zaýyty, 2 jartylaı koks óndirý zaýyty jáne 5 ferroqorytpa zaýytyn iske qosý kiredi. Jobalardy iske qosý 1,2 mlrd AQSh dollary kólemindegi ımportty almastyrýǵa, sonymen birge 3 mlrd AQSh dollary somasyna eksportqa shyǵarýǵa baǵyttalǵan.
«Tústi metallýrgııa salasynda 2025 jylǵa deıin 11 negizgi jobany iske asyrý josparlanyp otyr. Alıýmınııden ónim óndirý boıynsha 6 negizgi jobany júzege asyrý josparlanýda. Bul eksport kólemin 645 mln AQSh dollaryna arttyrýǵa múmkindik beredi. Mystan daıyn buıymdar shyǵaratyn 3 zaýyttyń qurylysy josparlanýda. Bul da eksport kólemin 200 mln AQSh dollaryna ulǵaıtýǵa múmkindik ashady», - dedi ol.
