Qara metallýrgııa salasyndaǵy jobalar aıasynda 10 myńnan astam jumys orny ashylady
ASTANA. KAZINFORM – 2026 jyly elimizdiń qara metallýrgııa salasynda jalpy ınvestıtsııa kólemi shamamen 154 mlrd teńgeni quraıtyn jeti jobany iske qosý josparlanyp otyr.
Nátıjesinde 1,1 myńnan astam turaqty jumys orny ashylady dep kútilýde.
Bıyl qara metallýrgııa salasyndaǵy jobalardy iske asyrý aıasynda ferrosılıtsıı, túrli dıametrdegi armatýra, tik jikti jáne myryshtalǵan qubyrlar óndirisi iske qosylady.
Budan bólek, atalǵan salada taǵy jeti joba iske asyrylyp jatyr.
Olar 2027–2028 jyldary iske qosylady dep josparlanyp otyr. Jobalardyń jalpy quny 2 trln teńgeden asady. Atalǵan jobalar sheńberinde ferroqorytpa, profıldi jáne jolaqty bolat, bolat daıyndamalar, sym jáne iri kólemdi bolat qubyrlar óndirisi jolǵa qoıylady. Osy jobalardy júzege asyrý nátıjesinde 3,5 myńnan astam turaqty jumys orny ashylady dep kútilýde, onyń shamamen 1,2 myńy aýyldyq jerlerge tıesili.
Sonymen qatar salada taǵy 16 joba pysyqtalý ústinde. Olar ystyqtaı brıkettelgen jáne keýekti temir, premıým sanattaǵy bolat, joǵary tazalyqtaǵy marganets, untaqtaýshy sharlar, elektrmen dánekerlengen qubyrlar, shvellerler, sondaı-aq ózge de temir jáne bolat ónimderin óndirýge baǵyttalǵan. Bul jobalarǵa salynatyn ınvestıtsııa kólemi 2,8 trln teńge, nátıjesinde 5,5 myń jumys ornyn qurý kózdelip otyr.
Jalpy, iske asyrylyp jatqan jáne aldaǵy kezeńge josparlanǵan 30 joba boıynsha shamamen 5 trln teńge ınvestıtsııa tartý jáne 10,2 myń jumys ornyn ashý kózdelgen. Onyń 3,7 myńy aýyldyq jerlerde qurylmaq.
Dırektsııa mamandarynyń aıtýynsha, qara metallýrgııa – elimizdiń ónerkásiptik kesheniniń iri ári jetekshi salalarynyń biri. Salanyń turaqty damýyna ózindik shıkizat bazasynyń (iri temir jáne kremnıı ken oryndary) bolýy jáne ártúrli quramdaǵy ferroqorytpalar óndirisiniń damýy oń áser etýde.
Aıta keteıik, qara metallýrgııa ónimderin óndirý boıynsha iri jobalardy Qaraǵandy, Qostanaı, Pavlodar jáne Jambyl oblystary aýmaqtarynda júzege asyrý josparlanýda.
Eske salsaq Qazaqstanda qaıta óńdeýge jaramdy 56 mlrd tonna metallýrgııa qaldyǵy bar ekendigin jazǵan edik.