Qara metallýrgııa ekinshi jyl qatarynan quldyraýda
NUR-SULTAN. QazAqparat – Elimizde qara metallýrgııa salasyndaǵy óndiris 2 jyl qatarynan teris mán kórsetip otyr. Bolat óndirý 18 paıyzǵa qysqarǵan. Basty úsh óńirdegi óndirýshiler arasynda Qaraǵandy oblysynyń metallýrgııasy ǵana oń nátıje kórsetýde, dep habarlaıdy QazAqparat tilshisi energyprom.kz-ke silteme jasap.
2020 jyldyń qańtar-tamyzynda qara metallýrııa salasyndaǵy óndiris aqshaǵa shaqqanda 1,1 trln teńgeni qurap, ótken jyldyń dál osyndaı kezeńimen salystyrǵanda 6,2 paıyzǵa kemidi. Ónim kólemi 2 jyl qatarynan tómendeýde. Ótken jyldyń 8 aıynda óndiris kólemi 6,8 paıyzǵa qysqarǵan bolatyn. Degenmen, 2019 jyldyń qańtar-jeltoqsanynda ónerkásip óndirisiniń ındeksi 101,3 paıyz boldy.
Qazaqstanda qara metallýrgııa salasyndaǵy óndiris negizgi úsh óńirde shoǵyrlanǵan: bolat óndiretin ArcelorMittal kompanııasy ornalasqan Qaraǵandy oblysy (442,3 mlrd teńge, aqshaǵa shaqqanda jyl ishinde 8,5 paıyz ósim bar); KSP Steel jáne Aqsý ferroqorytpa zaýyty bar Pavlodar oblysy (286,6 mlrd teńge,18,7 paıyz teris mánge ıe) jáne Aqtóbe ferroqorytpa zaýyty jumys isteıtin Aqtóbe oblysy (202,6 mlrd teńge, 14,6 paıyz teris mánge ıe).
Sektorda naqty mánde bolat jabyndysy bar tabaqtardan sedvıch-panelder óndirisi 31,4 paıyzǵa artyp, 10,6 myń tonnany qurady. Jazyq ılek óndirisi de 11,1 paıyz ulǵaıyp, 1,7 mln tonnaǵa jetti. Al tazartylmaǵan bolat óndirisi 17,5 paıyzǵa, 2,5 mln tonnaǵa qysqardy. Degenmen, qospa bolat óndirisi 28,7 paıyzǵa kóbeıip, 3,9 myń tonna boldy.
