Qara maıor turǵan úıge memorıaldyq taqta ornatyldy
Batyrdy eske alýǵa Borıs Kerimbaevtyń týystary men jaqyndary, Desanttyq-shabýyldaý áskerleriniń qolbasshylyǵy men jeke quramy, ózi alǵashqy komandıri bolǵan arnaıy maqsattaǵy bólimsheler, Qurlyq áskerleri áskerı ınstıtýtynyń jáne Radıoelektronıka jáne baılanys áskerı-ınjenerlik ınstıtýtynyń kýrsanttary jınaldy.
Borıs Tókenuly turǵan úıdiń janyna Aýǵan soǵysynyń ardagerleri, «Jas sarbaz» respýblıkalyq qozǵalysy men Qara maıor atyndaǵy áskerı-patrıottyq klýbtyń tárbıelenýshileri sap túzedi. Bul is-sharaǵa 1979 jyly Amınniń saraıyna shabýyl jasaýshy, Aýǵan soǵysynyń ardageri, birinshi «musylman batalonynyń» komandıri, polkovnık Habıbjan Holbaev arnaıy keldi.
Mıtıngti Desanttyq-shabýyldaý áskerleriniń qolbasshysy general-maıor Almaz Jumakeev ashty. Ol Qara maıordyń ómiri men áskerı joly, onyń sińirgen eńbegi, Borıs Kerimbaevtyń baǵa jetpes áskerı tájirıbesi týraly aıtty.
«Osy eskertkish taqtany asha otyryp, Desanttyq-shabýyldaý áskerleriniń quramalary men bólimderinde Qara maıordy eske alý buryshy qurylǵanyn aıtqym keledi. Jas sarbazdar qyzmet etýge kelgende olarǵa birinshi kezekte batyrdyń erjúrek áskerı jáne ómir joly tanystyrylady», - dep atap ótti general-maıor Almaz Jumakeev.
Іs-shara gúl shoqtaryn qoıýmen jáne saltanatty sherýmen aıaqtaldy.
Aıta keteıik, Borıs Kerimbaev - Aýǵan soǵysy kezinde aty ańyzǵa aınalǵan qolbasshy. Ol 1981 jyldan 1983 jylǵa deıin Aýǵanstanda boldy. Bir jylǵa jýyq ýaqyt ishinde onyń«ekinshi musylman batalony» strategııalyq mańyzdy Pandjsher shatqalyn ustap turyp, kúshi basym modjahedtermen shaıqas júrgizdi. 177 jasaqtyń sátti áreketteriniń nátıjesinde modjahedter osy mańyzdy baǵyttaǵy qımyldaryn toqtatýǵa jáne bitimge kelýge májbúr boldy.
