«Qara maıor» atymen esimi ańyzǵa aınalǵan Aýǵan soǵysynyń ardageri jaıly kıno túsirilýde
; ALMATY. Jeltoqsannyń 8-i. QazAqparat / Ádilet Musahaev / - Almaty oblysyndaǵy Tamǵaly shatqalynda «Naǵyz polkovnık» fılminiń túsirilimi júrip jatyr,
dep habarlaıdy QazAqparat.
«Reseılik teledıdar qyzmetkerleri men qazaqstandyq kınematograftardyń kreatıvti toby «Aleksandr Makedonskııdiń izimen» derekti fılmin túsirýge Almatydan Aýǵanstanǵa qaterli saparǵa shyǵady. Olardy aýǵan jerinde soǵysqan jáne soǵys barysynda jaýynger dosyn joǵaltqan Marat Aıýmov bastap júredi. Ol parsy tilin jetik biledi, ári aýǵan dástúrin jáne zańdarymen jaqsy tanys. Biraq onyń Aýǵan soǵysy kezinde KSRO-nyń GRÝ arnaıy jasaǵynyń buıryǵymen musylman batalonynyń quramynda qyzmet etkenin, ol jaıynda «Qara maıor» ańyzy taraǵanyn jáne Aýǵanstanǵa oralýynyń ózindik jeke sebepteri bar ekenin eshkim bilmeıdi...»
Fılmdi Sh.Aımanov atyndaǵy «Qazahfılm» kınostýdııasy men «Báıterek» prodıýserlik ortalyǵy túsirýde. Oǵan Úkimetten 5 mıllıon AQSh dollary bólingen. Qoıýshy-rejısser reseılik Egor Mıhalkov- Konchalovskıı. Basty rólge Berik Aıtjanov, sonymen qatar Arman Ásenov, Asha Mataı jáne reseılik Denıs Nıkıforov, Gosha Kýtsenko, Natalıa Arynbasarova sııaqty tanymal akterler qatysady.
«Qazaqstanda kıno túsirý kókeıimde júrgen jospardyń biri edi. Qazaqstan - ekinshi otanym desem bolady. Kıno Aýǵan soǵysyna qatysqan Marat Aıýmov jaıly bolmaq. Fılm barysynda onyń jastyq shaǵy men qazirgi ýaqyttaǵy ómiri beınelenedi. Bul fılm Keńes úkimeti tusyndaǵy adamdar jaıly, óıtkeni Aýǵan soǵysy Keńes úkimeti kezeńinde ótti ǵoı. Sondaı-aq atalmysh soǵysta kóptegen qazaqstandyqtardyń erlik jasaǵanyn kórsetkimiz keledi», deıdi E. Mıhalkov-Konchalovskıı.
Qazan aıynyń 25-de túsirilimi bastalǵan bul kıno Uly Jeńistiń 65 jyldyǵynda kórermen nazaryna usynylmaq.
