«Qara qyz» fılminiń túsirilimi úshin tutas bir aýyl salyndy

QONAEV. QazAqparat - Almaty oblysy Eńbekshiqazaq aýdany Aqshı aýylyna jaqyn mańda rejısser Talǵat Temenovtiń «Qara qyz» áskerı dramasy túsirilip jatyr. Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen túsirilip jatqan fılm úshin tutastaı bir aýyl salynǵan, dep habarlaıdy QazAqparat.

Sol kezeńniń atmosferasyn tolyǵymen jetkizý úshin keskindemeshi-sýretshiler jazyq dalada soǵys kezinde bolǵan tutas bir aýyldy saldy, onda temirjol vokzaly, klýb, mektep, poshta, dıirmen, turǵyn úıler bar.

«Munyń bárin salý úshin bir jarym aıdaı ýaqyt ketti. Qıyn jaǵdaıda jasaldy, aınalada eshteńe joq, on adam jumys istedik. Barlyǵy arhıvtik ótken ǵasyrdyń 30-40 jyldaryndaǵy qujattardyń negizinde jasaldy. Jalpy on bes ǵımarat turǵyzdyq», - deıdi kartınanyń qoıýshy-sýretshisi Erken Súleımenov.

Erken osy fılmniń Soltústik Qazaqstan oblysynda ótken túsirilim jumystaryna da qatysqan. Ol jerde onyń komandasy jertasalar, jattyǵý ortalyǵy, jaý komendatýrasy jáne aýrýhana salǵan. On jyldyq tájirıbesi bar qoıýshy-sýretshi atap ótkendeı, ol óziniń sońǵy jumysyn bolashaq fılmderge arnalǵan dekoratsııa retinde qaldyrǵysy keledi.

«Men bul salada uzaq ýaqyt jumys istedim, túsirilimnen keıin biz ádette dekoratsııany buzamyz. Ondaı kezde ishiń kúıedi. Bul meniń ákemniń jeri, men bul aýyldy qaldyrǵym keledi, árıne, keleshekte kınorejısserlerge kómektesý úshin. Ásirese jas stýdentterge, olardyń dıplomdyq jumystary úshin keremet bolar edi», - dep atap ótti E. Súleımenov.

«Qara qyz» – Uly Otan soǵysy kezindegi adamdardyń ómirin baıandaıtyn áskerı drama. Fılmde soǵystyń qasiretine qaramastan, birin-biri tabatyn keıipkerlerdiń oqıǵalary baıandalady.

Basty rólderdi jas akterler Nuraı Saqtapova men Erlan Qulmurzın somdaıdy. Nuraı úshin bul kınodaǵy debıýttik ról, al Erlan telehıkaıalarda kópten beri oınap keledi.

«Meniń keıipkerimniń aty – Asqarbek, qarapaıym aýyl jigiti, soǵys jyldarynda ony maıdanǵa shaqyrady, onda ol batyldyqpen kúresedi. Fılmde aýyr sahnalar kóp, kórermenderdiń qyzyǵýshylyǵyn saqtap qalý úshin barlyq qupııalardy ashpaı-aq qoıaıyn», — deıdi Erlan Qulmurzın.

Sondaı-aq, fılmde tanymal akterler Dýlyǵa Aqmolda, Medǵat Ómirálıev jáne t.b. jumys isteıdi. Kartınanyń negizgi túsirilimi aǵymdaǵy jyldyń 23 qyrkúıegi men 14 qazany aralyǵynda Soltústik Qazaqstan oblysynyń aýmaǵynda, Qyzyljar qalasynyń mańynda ótti. Aqshı aýylyndaǵy túsirilim 2 qarashada aıaqtalýy tıis.

Kartınanyń tusaýkeseri kelesi jyldyń kóktemine josparlanǵan.