Qara qyldy qaq jarǵan bıler qazirgi sýdıalarǵa úlgi - professor
KÓKShETAÝ. QazAqparat - Aqmola oblystyq soty men Sh.Ýálıhanov atyndaǵy Kókshetaý memlekettik ýnıversıteti birlesip, «Qazaq dalasynyń bıler soty - egemendi elimizdiń sot-quqyqtyq júıesiniń negizi» atty ǵylymı-praktıkalyq konferentsııasyn ótkizdi, dep habarlaıdy QazAqparat tilshisi.
Ýnıversıtet ǵımaratynda uıymdastyrylǵan sharaǵa oblys ákiminiń orynbasary Aına Mysyrálimova, Joǵarǵy sottyń sýdıasy, Joǵarǵy sot keńesiniń múshesi Ádil Quryqbaev, ǵalymdar men quqyq qorǵaý salasynyń basshylary, qoǵamdyq uıymdardyń ókilderi qatysty.
Ǵylymı-praktıkalyq konferentsııada Joǵarǵy sottyń sýdıasy Ádil Quryqbaev Joǵarǵy sot tóraǵasy Qaırat Mámıdiń quttyqtaý hatyn oqyp berdi. Oblys ákiminiń orynbasary Aına Mysyrálimova Elbasymyzdyń «Bolashaqqa baǵdar: rýhanı jańǵyrý» maqalasynda kóterilgen bastamalardy júzege asyrý baǵytynda Aqmola oblysynda da kóptegen is-sharalar ótkizilip, naqty jumystar atqarylyp jatqanyn aıta kele, búgingi ótkizilip otyrǵan konferentsııa da rýhanı jańǵyrýǵa ún qosqan mańyzdy shara bolatynyna senim bildirdi.
Sh.Ýálıhanov atyndaǵy Kókshetaý memlekettik ýnıversıtetiniń rektory, tehnıka ǵylymdarynyń doktory, professor Ábdimútálip Ábjapparov «Qazaqtyń bı-sheshenderi qaıtalanbas tarıhı tulǵalar. Qazaqtan basqa bir de bir halyqta el ómiriniń barlyq qyrlaryna aralasatyn qazaq bıleri sııaqty tulǵalar bolmaǵan. Qara qyldy qaq jarǵan qazaq bıleriniń bıligi qazirgi sýdıalarǵa úlgi», dep atap ótti.
Sonymen qatar, oblystyq sottyń tóraǵasy Dosjan Ámirovtiń «Bıler soty - táýelsiz elimizdiń sot-quqyqtyq júıesiniń negizi» atty baıandamasy tyńdaldy.
