«Qara kıimdiler 3-tiń» qazaq tilinde dýblıajdalǵan túri DVD jáne Blu-ray dıskterinde satylyp jatyr
ASTANA. 21 qyrkúıek. QazAqparat - Búginnen bastap «Qara kıimdiler 3» fılmi DVD jáne Blu-ray formattarynda taratyla bastady.
Qazaq tili «Columbia Pictures» kınostýdııasynyń «Qara kıimdiler 3» fılminiń keıipkerleri sóılegen álemniń 7-shi tili bolmaq. «Columbia Pictures» kompanııasynyń dıskteriniń «Tilder» bóliminde alǵash ret qazaq tili paıda boldy. Bul jaıynda «Bolashaq» qaýymdastyǵynyń baspasóz qyzmeti habarlap otyr.
Aýdarmanyń dáldigin qamtamasyz etý úshin fılm mátini aǵylshyn tilinen tikeleı qazaq tiline aýdaryldy. Dýblıaj halyqaralyq sapa standarttaryna sáıkes keledi. Jobany qazaq tiliniń erekshelikterine sáıkes keletin jańa fılm dep te aıtýǵa bolady.
Dybystaý jumystary Almaty qalasyndaǵy «Cinema Tone Production» stýdııasynda ótkizildi. Aqyrǵy montaj jumystary London qalasyndaǵy «Shepperton» stýdııasynda jasaldy. Fılmniń qazaq tildi nusqasyn shyǵarý úshin AQSh, Ulybrıtanııa, Reseı, Qazaqstan elderiniń mamandary qyzmet etti.
Aıta keteıik, amerıkandyq akter Ýıll Smıtti dybystaý úshin Azamat Qanapııaev tańdaldy. Azamat «Kólikter 2» mýltfılminiń keıipkeri Metrdi de dybystaǵan bolatyn. Ýolt Dısneı kompanııasynyń ókilderi onyń daýysyna joǵary baǵa berdi. «Qara kıimdiler 3» - 2012 jyldyń eń mańyzdy premeralarynyń biri, Jerdegi ǵalamsharlyqtardyń qyzmetin qadaǵalap otyratyn qupııa uıymnyń qyzmetkerleri jaıly fılmniń jalǵasy. Komedııa janrynda túsirilgen bul fılm dostyq, adaldyq, batyldyq sekildi qundylyqtardy nasıhattaıdy.
Fılmniń dýblıajyn «Bolashaq» qaýymdastyǵy «MARWIN» kompanııasymen birlese otyryp, «Samuryq-Qazyna» ulttyq ál-aýqat qory» AQ qoldaýymen júzege asyrdy.
Kúzde, sonymen qatar, «Batyl júrek» pen «Jańa Órmekshi adam» fılmderiniń memlekettik tilge dýblıajdanǵan túri DVD jáne Blu-ray dıskterinde shyǵady.
