Qara Ertiske bekire oraldy
ÓSKEMEN. KAZINFORM - Shyǵys Qazaqstan oblysynyń ákimi Ermek Kósherbaev pen «Ost Fish» JShS basshylyǵy arasyndaǵy kezdesýde Zaısan-Ertis basseınine bekire balyǵyn jiberý týraly usynys aıtylǵan. Ol usynys dereý iske asyp, Qara Ertiske áldeqashan joıylyp ketken Sibir bekiresi jiberildi.
Jergilikti halyq úshin de, Zaısan kóli men Qara Ertis ózeniniń ekojúıesi úshin de mańyzy zor is-sharaǵa Shyǵysqa jumys saparymen kelgen ekologııa mınıstri Erlan Nysanbaev qatysty.
Aıta keteıik, bul jumysty oblysymyzdaǵy bekire balyǵynyń ýyldyryǵyn jáne etin óndirýmen aınalysatyn irgeli kásiporyndardyń biri «Ost Fish» JShS qolǵa alǵan.
Atalǵan kásiporynnyń bas dırektory Erlan Saǵıdoldın ekologııa mınıstrine bekire tuqymdas balyqtardy ósirýdiń erekshelikteri, olardy qorǵaý, jergilikti ekojúıeni saqtaý jáne basqa da máseleler jóninde baıan etti.
– Búginde biz bekireniń úsh túrin ósiremiz. Onyń ishinde Sibir bekiresi de bar. Bıylǵy kóktemde kásipornymyzda tehnologııany jańartý jumystary júrgizilgen. Sonyń nátıjesinde jylyna 500 myńǵa jýyq shabaq alýǵa bolatyndaı ınfraqurylym quryldy. Endi shabaqtarymyzdy Abaı, Pavlodar jáne Shyǵys Qazaqstan oblystarynyń sý aıdyndaryna jiberýdi josparlap otyrmyz, – dep málim etti kásiporyn basshysy.
Onyń aıtýynsha, búgin Marqakól men Zaısan aýdandaryn bólip jatqan Qara Ertis ózenine Sibir bekiresiniń bir jasar 500 daraǵy jiberildi. Balyqtardyń árqaısynyń salmaǵy 1,5 kelige deıin tartady. Demek olarǵa bul sýlardy meken etetin jyrtqysh balyqtardan keler qaýip joq.
Kóppen birge Sibir bekiresiniń tarıhı mekenine oralýyna kýá bolǵan ekologııa mınıstri Erlan Nysanbaev bul óte quptarlyq bastama ekenin aıtty. Sebebi, Sibir bekiresi Zaısan men Ertisti ejelden mekendegen. Alaıda ótken ǵasyrdyń 50-60 jyldaryndaǵy sý elektr stansalarynyń salynýy ádette Sibir men Altaı arasynda órlep-quldap júretin balyqtardyń joǵary óristeýine tosqaýyl bolǵan. Endi mine, bul problema da sheshimin tapqandaı.
– Sibir bekiresin Zaısan basseınine, Qara Ertiske jersindirýdi kózdep, bul baǵytta batyl áreket etken azamattarǵa alǵystan basqa aıtarym joq. Eńbekterine tek sáttilik tileımin. Mınıstrlik tarapynan bul bastamaǵa ún qosyp, qoldaý bildirýge daıarmyz. Bul baǵyttaǵy jumystar aldaǵy ýaqytta jalǵasyn tabatyn bolady, – degen vedomstvo basshysy qazir balyq ósiremin degenderge memleket tarapynan jan-jaqty qoldaý bar ekenin jetkizdi.
