«Qara beretten» úmitkerler «naǵyz erkektiń emtıhanyn» tapsyrdy

ASTANA. QazAqparat - Prezıdenttiń qatysýymen ótetin resmı sharalarda qara kostıým men qara kózildirik kıgen suńǵaq boıly jigitterdi jıi kóretinimiz bar. Olar oń qoldaryn kóterip, bir-birimen únemi sóılesip júredi. Іshterinde qara chemodan ustaıtyndar da bolady. Bul jigitterdiń bári Memlekettik kúzet qyzmetinde isteıdi. Olar Elbasynyń qaýipsizdigine ǵana emes, shetelden keletin mártebeli meımandardyń ómirine de jaýapty. Al ondaıda jeke daıyndyqqa qoıylatyn talap joǵary. Ótken demalys kúnderi elıtalyq jasaqtyń jigitteri jýrnalısterge óz daıyndyǵyn shyńdaýdyń taǵy bir sharasyn kórsetti. Bul joly «qara beret» ataǵy úshin kezekti synaq uıymdastyryldy, dep xabarlaıdy QazAqparat tilshisi.

Sońǵy on jyldyń ishinde «qara beret» úshin júzdegen jigitter talasyp kórdi. Alaıda myńdaǵan áskerılerdiń armany bolǵan ataqqa barlyǵy birdeı ilige almaıdy. Sebebi túgel synnan ótý - qıynnyń qıyny. Sodan bolar, «qara beret» úshin synaqty «naǵyz erkekterdiń emtıhany» dep ataıdy. Osy joly da Memlekettik kúzet qyzmetiniń 40-qa jýyq sarbazy óz kúshterin synap kórdi.

 

Synaqtyń ózi eki kezeńnen turady. Aldymen úmitkerdiń atys sheberligi, jalpy deneshynyqtyrý daıyndyǵy, sonyń ishinde júgirý men júzý mashyǵy tekseriledi. Budan bólek, teorııalyq synaqtar da bar. Al sonyń barlyǵyna qoıylatyn talap jyl saıyn kúsheıip keledi. Máselen, buryn ekinshi kezeńge ótý úshin «jaqsy» degen baǵa jetkilikti bolsa, qazir «óte jaqsyny» almasań, ekinshi kezeńge ótýge ruqsat joq. Sodan bolar, osy joly kelesi kezeńge tek 12 úmitker ǵana ótti. 

 

Ekinshi kezeńniń talaptary da joǵary, tipten kúrdeli deýge bolady. 2 saǵat 20 mınýttyń ishinde 20 shaqyrymdy jedel marshpen júgirip ótý kerek. Jaı júgirip ótpeı, arnaıy tapsyrmalardy da oryndaý qajet. Atap aıtqanda, ózenniń ústimen tartylǵan arqanmen arǵy betke ótý, gaztutqyshty kıip alyp, shartty túrde ýlanǵan aımaqty eńserý, taýǵa arqanmen órmelep shyǵý, atys alańynan jer baýyrlap ótý, avtomat, tapanshamen jyldam atý, jaraqat alǵan adamǵa alǵashqy medıtsınalyq kómek kórsetip, ony belgili bir jerge deıin kóterip aparý sııaqty tapsyrmalardy shapshań atqaryp shyǵý mindeti bar. Osy kezde arnaıy ınstrýktorlar úmitkerdiń artynan qalmaı, aspanǵa oq atyp, únemi aıqaılap, úmitkerdi qamshylap otyrady. Sóıtip, adamnyń júıkesi de synalady. Kezinde olar da osy synaqtardan ótip, «qara beretke» qol jetkizgen edi.   

 

Sońǵy kezeńnin máre syzyǵyna ýaqytynda jetý - bir qýanysh. Degenmen, synaq onymen aıaqtalmaıdy. Úmitker birden jekpe-jekke shyǵýy tıis. Arnaıy kıim-keshek pen jabdyqtardy sheshýge ruqsat joq. Sol kúıinde úsh qarsylaspen aıqasý kerek. Ondaıda qol-aıaqtyń kúshi ábden sarqylyp tursa da, qarsylastyń barlyq soqqylaryna shydaý qajet. Qarymta soqqylardy da jasamasań, qulap qalýyń ábden múmkin. Sebebi sparrıng sportshy úmitkerdi aıamaıdy, baryn salyp, qulatýǵa tyrysady. Al qulap, tura almaı qalsań, qolǵa tıip turǵan «qara beretten» aıyrylǵanyń. 12 úmitkerdiń barlyǵy osyny jaqsy bildi, armandaryna eki-úsh qadamnyń da qalǵanyn ishteı sezdi. Alaıda beseýi súrinip qaldy. Sóıtip, osy joly Memlekettik kúzet qyzmetiniń 7 sarbazy «qara berettiń» ıegeri atandy.

 

«Qara beret» - álemniń kóptegen elderiniń qarýly kúshteri men arnaýly bólimshelerinde keńinen qoldanylatyn áskerılerdiń nysandy bas kıimi. «Qara beret» tek aıyrym belgisi ǵana emes, ol Qazaqstan Respýblıkasy Memlekettik kúzet qyzmeti qyzmetkerleri men áskerı qyzmetshileriniń abyroı-bedeli bolyp tabylady, ol - erliktiń, batyldyq pen namys-jigerdiń, sondaı-aq dene shynyqtyrý, áskerı, mamandandyrylǵan jáne kásibı daıyndyqtyń nyshanyn bildiredi. Oǵan ıe bolǵan qyzmetkerler ózderiniń kásibı, jaýyngerlik jáne dene shynyqtyrý daıarlyǵyn únemi jetildirip otyrýy mindet», - deıdi MKQ qyzmetkeri, «qara beret» ıegeri Aıdyn Muqatov. 

Al «Qara beret» sarbazǵa ne beredi?» degen suraqqa keler bolsaq, joǵary turǵan laýazymǵa taǵaıyndaý jáne arnaýly ataqty merziminen buryn berý kezinde aldymen «qara beret» ıegerlerine basymdyq beriledi. Olarǵa jaýapty ister tapsyrylady. Sebebi ondaı qyzmetkerler óz daıyndyǵyn joǵary dárejede dáleldeı bildi. «Qara beret» barlyq qyzmetterde saqtalady. Zapas bolsyn, otstavka bolsyn, «qara berettiń» ıegeri jaýapkershilik pen tabandylyqtyń úlgisi bolyp qala beredi.   

«Testileýdiń negizgi maqsaty - qyzmetkerler men áskerı qyzmetshilerdiń jeke daıyndyǵyn baǵalap, úzdikterdi anyqtaý. Sondaı-aq, bul synaqtar qyzmetkerler men áskerı qyzmetshilerge kásibı turǵydan serpilis berip, olardyń boıyndaǵy patrıottyq sezimdi arttyryp, rýhtandyrýdy kózdeıdi. Bizden keıingi sarbazdarǵa da úlgi bolatyny anyq», -  deıdi MKQ qyzmetkeri Rınat Ábikeshev.


Aıta ketken jón, búginde biz áli kúnge deıin Prezıdent kúzetshilerin «SOP» (Slýjba ohrany Prezıdenta - avt.) dep atap júrmiz. Alaıda QR Prezıdentiniń kúzet qyzmeti men Respýblıkalyq ulan qosylǵannan keıin QR Memlekettik kúzet qyzmeti qurylǵan bolatyn. Qazirgi kezde atalǵan qurylym Prezıdent pen joǵary mártebeli qonaqtardyń ǵana emes, memlekettik mańyzy bar nysandardyń qaýipsizdigine de jaýap beredi. Demek, MKQ-nyń qyzmet aıasy da, jaýapkershiligi de, daıyndyqqa qoıylatyn talap ta arta tústi.