Qar jaýyp, kóktaıǵaq bolady: 13 qańtarǵa aýa raıy boljamy

Sınoptıkterdiń boljamyna súıensek, 13 qańtarda Abaı oblysynyń soltústiginde, shyǵysynda, ortalyǵynda qar jaýyp, burqasyn júredi, kóktaıǵaq bolady. Oblystyń batysynda, soltústiginde, ońtústiginde soltústik-batystan soqqan jeldiń ekpini 15-20 m/s, túndegi ekpini 23 m/s deıin jetedi. Semeıde 13 qańtarda túnde jáne tańerteń qar jaýyp, burqasyn júredi, kóktaıǵaq bolady dep boljanady. Soltústik-batystan jel soǵady, túndegi ekpini - 15-20 m/s.

Soltústik Qazaqstan oblysynda túnde jáne kúndiz synap baǵany 20-25 gradýs sýyqty, 14-15 qańtarda túnde 30-35 gradýs, oblystyń soltústiginde, shyǵysynda 38 gradýs aıazdy kórsetip, odan ári tómendeıdi. Túnde oblystyń ońtústiginde, shyǵysynda azdap qar jaýady, jaıaý burqasyn júredi, oblystyń batysynda, ońtústiginde tuman túsedi. Soltústik-batystan jel soǵady, túnde oblystyń ońtústiginde, shyǵysyndaǵy ekpini 15-20 m/s qamtıdy. Petropavlda 13 qańtarda aýa temperatýrasy túnde jáne kúndiz 22-24 gradýs aıaz, 14-15 qańtarda túnde 33-35 gradýs aıaz bolady dep boljanady.

Atyraý oblysynyń soltústiginde, batysynda, ońtústiginde tuman, kóktaıǵaq bolady. Oblystyń soltústiginde, shyǵysynda, ońtústiginde ońtústik-shyǵystan, shyǵystan soqqan jeldiń ekpini 15-20 m/s, keı tusta 23 m/s deıin jetedi. Atyraýda 13 qańtarda túnde jáne tańerteń tuman, kóktaıǵaq bolady. Ońtústik-shyǵystan jel soǵady, túndegi ekpini - 15-18 m/s.

Qostanaı oblysynyń soltústiginde, ońtústiginde, shyǵysynda tuman túsedi. Soltústik-batystan shyǵysqa oıysa soqqan jeldiń kúndiz oblystyń batysyndaǵy ekpini 15-20 m/s.

Qaraǵandy oblysynyń soltústiginde, shyǵysynda azdap qar jaýady, jaıaý burqasyn júredi, kóktaıǵaq bolady, al oblystyń batysynda, soltústiginde, shyǵysynda tuman túsedi. Túnde oblystyń soltústiginde, shyǵysynda ońtústik-batystan, batystan soqqan jeldiń ekpini 15-20 m/s, keı tusta 23 m/s deıin jetedi. Qaraǵandyda 13 qańtarda túnde jáne tańerteń azdap qar jaýady, jaıaý burqasyn júredi, kóktaıǵaq bolady. Ońtústik-batystan, batystan jel soǵady, túndegi ekpini - 15-20 m/s.

Shyǵys Qazaqstan oblysynda qar jaýyp, burqasyn júredi, kóktaıǵaq bolady, túnde oblystyń soltústiginde, shyǵysynda qalyń qar túsedi. Oblystyń soltústiginde, ońtústiginde, shyǵysynda soltústik-batystan soqqan jeldiń ekpini 15-20 m/s, túndegi ekpini 23 m/s deıin jetedi. Óskemende 13 qańtarda qar jaýyp, burqasyn júredi, kóktaıǵaq bolady. Soltústik-batystan soqqan jeldiń túndegi ekpini 15-20 m/s.

Ulytaý oblysynyń soltústiginde, shyǵysynda, ortalyǵynda tuman túsedi. Kúnniń sońyna qaraı oblystyń soltústiginde, ońtústiginde ońtústik-shyǵystan jel soǵady, ekpini - 15-20 m/s. Jezqazǵanda 13 qańtarda tuman bolatyny boljanady.

Aqtóbe oblysynyń shyǵysynda tuman túsedi. Kúndiz oblystyń soltústiginde, shyǵysynda, ortalyǵynda ońtústik-shyǵystan soqqan jeldiń ekpini 15-20 m/s, keı tusta 23 m/s deıin jetedi. Aqtóbede 13 qańtarda ońtústik-shyǵystan jel soǵady, kúndizgi ekpini - 15 m/s.

Qyzylorda oblysynyń soltústiginde, ońtústiginde, ortalyǵynda tuman túsedi. Kúndiz oblystyń soltústiginde, ortalyǵynda shyǵystan soqqan jeldiń ekpini 15-20 m/s. Qyzylordada 13 qańtarda tuman bolatyny boljanady.

Astanada 13 qańtarda tuman, joldarda kóktaıǵaq bolady.

Túrkistan oblysynyń batysynda, soltústiginde, taýly aýdandarynda tuman bolady. Shymkent pen Túrkistan qalalarynda 13 qańtarda túnde jáne tańerteń tuman bolatyny boljanady.

Túnde jáne kúndiz Pavlodar oblysynyń soltústiginde, shyǵysynda qar jaýyp, burqasyn júredi, kóktaıǵaq bolady. Túnde jáne kúndiz oblysynyń batysynda, ońtústiginde soltústik-batystan jel soǵady, ekpini - 15-20 m/s. 13 qańtarda Pavlodar oblysynyń soltústiginde aýa temperatýrasy túnde 18-23 gradýs, 14-15 qańtarda túnde 30-35 gradýs, oblystyń soltústiginde 38 gradýs aıaz bolyp, synap baǵany odan ári tómendeıdi. Pavlodarda 13 qańtarda túnde qar jaýyp, burqasyn júredi, kóktaıǵaq bolady. Soltústik-batystan jel soǵady, túndegi - 15-20 m/s.

13-14 qańtarda Jambyl oblysynyń soltústiginde, ońtústiginde, taýly aýdandarynda tuman, kóktaıǵaq bolady. Soltústik-shyǵystan soqqan jeldiń oblystyń soltústik-shyǵysynda, taýly aýdandaryndaǵy ekpini 15-20 m/s, keı tusta 23 m/s deıin jetedi. Tarazda 13-14 qańtarda keı ýaqyttarda tuman túsedi.

Mańǵystaý oblysynyń soltústik-shyǵysynda jaıaý burqasyn júrip, oblystyń batysynda, ortalyǵynda tuman túsedi. Oblystyń ońtústik-batysynda, soltústik-shyǵysynda, ortalyǵynda soltústik-batystan soqqan jeldiń ekpini 15-20 m/s, túnde keı tusta 23 m/s deıin jetedi. Aqtaýda 13 qańtarda túnde jáne tańerteń tuman bolady.

Aqmola oblysynyń soltústiginde, shyǵysynda azdap qar jaýady, jaıaý burqasyn júredi, oblystyń batysynda, soltústiginde, shyǵysynda tuman túsedi, joldarda kóktaıǵaq bolady. Túnde jáne tańerteń oblystyń soltústiginde, shyǵysynda soltústik-batystan soltústik-shyǵysqa oıysa soqqan jeldiń ekpini 15-20 m/s. Oblysytyń soltústiginde, shyǵysynda synap baǵany túnde 18-23 gradýs, 14-15 qańtarda túnde 23-28 gradýs, oblystyń soltústiginde, shyǵysynda 35 gradýs aıazdy kórsetedi. Kókshetaýda 13 qańtarda aýa temperatýrasy túnde 18-20 gradýs, 14-15 qańtarda túnde 33-35 gradýs aıaz bolady dep boljanady.

Jetisý oblysynyń shyǵysynda, ortalyǵynda, taýly aýdandarynda keı ýaqyttarda tuman bolady. Oblystyń shyǵysynda, taýly aýdandarda ońtústik-shyǵystan jel soǵady, ekpini - 15-20 m/s. Taldyqorǵanda 13 qańtarda túnde jáne tańerteń keı ýaqyttarda tuman túsedi.

Almaty oblysynyń batysynda batystan soltústik-shyǵysqa oıysa soqqan jeldiń ekpini 18 m/s bolady. Qonaevta 13 qańtarda kúndiz batystan jel soǵady, ekpini - 18 m/s.

Aıta keteıik, Óskemende ekologter sary tústi qar jaýǵany týraly aqparatty tekserip jatyr.

Abaı men Shyǵys Qazaqstan oblystarynda birneshe jol jabyldy.