Qar úzdiksiz erise Baıanaýyldaǵy eldi mekenderdi sý basýy múmkin
PAVLODAR. QazAqparat - Pavlodar oblysynyń bıligi eldi mekenderdi sý basý qaýpiniń aldyn alý sharalaryn bastap ketti, dep habarlaıdy «QazAqparat» HAA tilshisi.
«Aldaǵy aýa raıy boljamdary men ótken jyldaǵy tájirıbelerdi esepke ala otyryp aımaqtaǵy sý basý qaýpi bar degen 57 eldi mekendi anyqtadyq. Onyń quramyna 1065 turǵyn úı, 58 ártúrli maqsattaǵy ǵımarat, 4619 adam kiredi. Sonymen qatar uzyndyǵy 4,951 shaqyrymǵa sozylatyn 42 avtomobıl joldary jáne temirjol ýchaskesi kiredi»,-dep habarlaıdy óńirlik TJD.
Qazir mamandar qardyń qalyńdyǵynan bastap, qaýipti jaǵdaı týa qalǵanda turǵyndardy evakýatsııalaý baǵyttaryn, qajetti tehnıkany saılaý sııaqty jumystardy pysyqtap jatyr. Sonymen birge jergilikti basshylar qaýipti sý qoımalarynyń basyna baryp, nysandardyń beriktigin baqylaýǵa aldy.
Baıanaýyl aýdanynda byltyrǵyǵa qaraǵanda qar az túsken. Soǵan qaramastan mamandar kún jylynyp qar úzdiksiz erise eldi mekenderdi sý basý qaýpiniń arta túsetindigin aıtady. Tótenshe jaǵdaılardyń aldyn alý aılyǵy 20 naýryzǵa deıin sozylmaq.
