Qar, úsik, tuman: elimizdiń 11 aımaǵynda daýyldy eskertý jarııalandy

ASTANA. KAZINFORM — «Qazgıdromet» RMQ erteń Qazaqstannyń 11 óńirinde daýyldy eskertý jarııalanǵanyn málim etti. 

6 qazanda Atyraý oblysynda shyǵystan, ońtústik-shyǵystan jel soǵady, túnde oblystyń shyǵysynda ekpini 15-20 m/s. Oblystyń soltústiginde, ońtústiginde, shyǵysynda tótenshe órt qaýpi, oblystyń soltústik-shyǵysynda joǵary órt qaýpi saqtalady. 

Túrkistan oblysynyń soltústiginde, batysynda shańdy daýyl kútiledi. Soltústik-shyǵystan jel soǵady, oblystyń soltústiginde, batysynda, taýly aýdandarynda kúshi 15-20 m/s. Oblystyń soltústiginde, ońtústiginde, batysynda, shóldi aýdandarynda tótenshe órt qaýpi saqtalady. Shymkentte soltústik-shyǵystan jel soǵady, ekpini 15-20 m/s. Túrkistanda keı ýaqyttarda shańdy daýyl kútiledi. Soltústik-shyǵystan jel soǵady, ekpini 15-20 m/s. Tótenshe órt qaýpi saqtalady.

Túnde Almaty oblysynyń taýly aýdandarynda tuman kútiledi. Túnde oblystyń soltústiginde, ońtústiginde 1-3 gradýs úsik kútiledi. Oblystyń soltústiginde tótenshe órt qaýpi saqtalady. Almaty q.: 06 qazanda túnde topyraq betinde 2 gradýs úsik kútiledi. Qonaev qalasynda 6 qazanda túnde topyraq betinde 2 gradýs úsik kútiledi.

Ulytaý oblysynyń shyǵysynda joǵary órt qaýpi, oblystyń ońtústiginde tótenshe órt qaýpi saqtalady.

Kúndiz Qyzylorda oblysynyń ortalyǵynda, shyǵysynda shańdy daýyl kútiledi. Soltústik-shyǵystan jel soǵady, tańerteń jáne kúndiz oblystyń ortalyǵynda, shyǵysynda kúshi 15-20 m/s kútiledi. Tótenshe órt qaýpi saqtalady. Qyzylorda qalasynda kúndiz shańdy daýyl kútiledi. Soltústik-shyǵystan jel soǵady, kúndiz ekpini 15-20 m/s kútiledi.

Jetisý oblysynda soltústik-shyǵystan jel soǵady, Alakól kólderi aýdanynda ekpini 15-20 m/s. Túnde oblystyń soltústiginde, ortalyǵynda 5 gradýs úsik kútiledi. Taldyqorǵanda 6 qazanda túnde 5-7 gradýs úsik kútiledi.

Qostanaı oblysynyń ońtústiginde joǵary órt qaýipi saqtalady.

Jambyl oblysynyń taýly aýdandarynda tuman kútiledi. Soltústik-shyǵystan jel soǵady, oblystyń ońtústik-batysynda, soltústik-shyǵysynda, taýly aýdandarynda 15-20, ekpini 25 m/s kútiledi. Túnde oblystyń batysynda, soltústiginde, ońtústiginde, taýly aýdandarynda 1-3 gradýs úsik kútiledi. Oblystyń batysynda, soltústiginde tótenshe órt qaýpi, oblystyń ortalyǵynda joǵary órt qaýpi saqtalady. Tarazda túnde topyraq betinde 2 gradýs úsik kútiledi.

Mańǵystaý oblysynda ońtústik-shyǵystan jel soǵady, túnde oblystyń batysynda ekpini 15-18 m/s kútiledi. Oblystyń batysynda, soltústik-shyǵysynda joǵary órt qaýpi saqtalady. Aqtaýda joǵary órt qaýpi saqtalady.

Batys Qazaqstan oblysynda jel ońtústik-shyǵystan soǵady, kúndiz oblystyń batysynda, shyǵysynda ekpini 15-20 m/s. Oblystyń batysynda, soltústiginde, ortalyǵynda joǵary órt qaýpi saqtalady, oblystyń soltústik-batysynda, ońtústiginde, ońtústik-shyǵysynda tótenshe órt qaýpi saqtalady. Oralda joǵary órt qaýpi saqtalady.

Aıta keteıik, buǵan deın Qazaqstannyń ońtústigi men batysynda shańdy daýyl turyp, shyǵysynda qar jaýatynyn jazǵan edik.