Qar, tuman, kóktaıǵaq: 11 jeltoqsan kúngi aýa raıy boljamy
NUR-SULTAN. QazAqparat – 11 jeltoqsan kúni respýblıkanyń soltústiginde, shyǵysynda jáne ortalyǵynda qar jaýady, ońtústik óńirlerdiń keı jerlerinde jaýyn-shashyn (kóbinese qar túrinde) bolady. Qazaqstan aýmaǵynyń qalǵan bóligine antıtsıklon áli de yqpalyn tıgizedi. Soǵan baılanysty jaýyn-shashynsyz aýa raıy saqtalady. Elimizdiń keı jerlerinde tuman, jeldiń kúsheıýi, jaıaý burqasyn kútiledi. Soltústik óńirlerde kóktaıǵaq boljanady, dep habarlaıdy QazAqparat.
«Qazgıdromet» RMK aqparatyna sáıkes, Shyǵys Qazaqstan oblysynyń keı jerlerinde tuman, burqasyn kútiledi, jel 15-20 m/s kúsheıedi.
Pavlodar oblysynyń keı jerlerinde tuman, jaıaý burqasyn bolady. Túnde jel 18 m/s artady.
Jambyl, Túrkistan, Aqmola, Almaty, Qyzylorda, Atyraý, Batys Qazaqstan, Aqtóbe, Qostanaı, Qaraǵandy oblystarynyń keı jerlerinde tuman boljanady. Kúndiz Jambyl, Túrkistan oblystarynyń keı jerlerinde jel 15-20 m/s kúsheıedi.
Soltústik Qazaqstan oblysynyń keı jerlerinde kóktaıǵaq, tuman bolady.
