«KaR-Tel» JShS Qazaqstan Tennıs federatsııasymen birge Býenos-Aıres qalasyna Devıs Kýbogyna baratyn qazaqstandyq jankúıerler komandasyn jasaqtaýda
ALMATY. 4 mamyr. QazAqparat /Názıra Eleýhan/ - «KaR-Tel» JShS (Qazaqstandaǵy Beeline brendi) Býenos-Aıres qalasyna tennısten Devıs Kýbogyna baratyn qazaqstandyq jankúıerler komandasyn jasaqtaýǵa baǵyttalǵan Qazaqstan Tennıs federatsııasynyń bastamasyn qoldap otyr.
Búgin olar Beeline abonentteri men buqaralyq aqparat quraldary arasynda birikken aktsııany bastady. Bul týraly búgin Almatyda ótken arnaıy baspasóz máslıhatynda atalmysh sharanyń uıymdastyrýshylary málim etti.
Aktsııalarǵa barlyq qazaqstandyq BAQ jýrnalısteri jáne tennıs jankúıerleri qatysa alady. Sonymen qatar, tennıstiń qyr-syryn jaqsy biletin Beeline abonentteri de SMS-baıqaýǵa qatysa alady. Durys jaýapty eń kóp bergen abonent shildeniń 7-9 aralyǵynda Býenos-Aıreste Devıs Kýbogy aıasynda ótetin Argentına jáne Qazaqstan quramalary arasyndaǵy kezdesýlerge joldamaǵa ıe bolady. Sondaı-aq, osyndaı júldelerge Qazaqstan tennısi taqyrybyndaǵy úzdik jarııalanym baıqaýynyń 4 jeńimpazy ıe bola alady.
«Beeline qazaqstandyq tennısti qoldaý arqyly, salaýatty ómir saltyn nasıhattap, deni saý urpaq tárbıeleýge atsalyspaq. Sport bizdiń kompanııanyń ustanymy bolyp sanalatyn údemeli damý men jetildirý, jańa jeńisterge umtylý sııaqty ıdeıalardy nasıhattaıdy», - dedi baspasóz máslıhatynda «KaR-Tel» JShS-niń Bas dırektory Anatolıı Popov.
Qazaqstan Tennıs federatsııasynyń vıtse-prezıdenti Ádil Búrlibaevtyń aıtýynsha, Tennıs federatsııasy Qazaqstanda jumys jasaıtyn kompanııalarǵa qazaqstandyq tennısshilerdiń Devıs Kýbogyndaǵy jeńisterine qoǵamnyń nazaryn burýdy korporatıvtik maqsattarda utymdy paıdalaný múmkindigin usynyp otyr. «Eger de bizdiń kompanııalar marketıngtik jáne jarnamalyq quraldar arqyly Argentınaǵa tym bolmaǵanda bir jankúıerdiń jolaqysyn kótere alsa, «Parque Roca» atty 13-myńdyq stadıonynda qazaqstandyq jankúıerlerdiń qarasy barynsha molaıar edi», - dep atap ótti ol.
