«KaR-Tel» baılanys operatory Google Translate aýdarma qyzmetine qazaq tilin engizýge baǵyttalǵan jobanyń seriktesine aınaldy

Joba Google kompanııasynyń tehnıkalyq qoldaýymen, QR Prezıdenti Ákimshiliginiń, «Wikibilim» qoǵamdyq qory men «Qazkontent» AQ-nyń qoldaýymen júzege asyrylmaq.

 «Prezıdent Ákimshiliginiń basshysy Kárim Másimovtiń basqaraýymen bizdiń qor memlekettik tildi, bilim berýdi, mádenıet pen ınnovatsııalyq tehnologııalardy  qoldaýǵa baǵyttalǵan birqatar jobalardy júzege asyrýda. Búginde bıznes-kompanııalardyń da osy baǵytta jumys jasaı bastaǵany qýantarlyq jaǵdaı. Biraq Google Translate júıesine qazaq tilin engizý úshin  júıege málimetti úlken kólemde salý qajet. Jobanyń tabysty iske asyrylýy oǵan qoǵam ókilderiniń keńinen jumyldyrylýyna baılanysty», - deıdi «Wikibilim» qoǵamdyq qorynyń jetekshisi Raýan Kenjehanuly.

«KaR-Tel» JShS-nyń PR-menedjeri Anar Jumaǵulovanyń aıtýynsha, Google Translate jahandyq onlaın-aýdarmashynyń «tilder otbasyna» qazaq tilin engizýge baǵyttalǵan áleýmettik jobany qoldaý árbir qazaqstandyq qatysa alatyn 7-shi ıgi is bolmaq. Jahandyq onlaın-aýdarmaǵa qazaq tilin engizý boıynsha joba ınternettegi qazaq tildi kontenttiń damýyna úlken serpin  beretinine senim  mol. Seriktestiktiń aıasynda mobıldi ınternet, sondaı-aq «Úıdegi ınternet» qyzmetiniń abonentterine Google Translate qyzmetine tegin kirý múmkindigi beriledi. Beeline jáne «Wikibilim» saıttarynda atalmysh qyzmetke aýdarylatyn mátindi qalaı engizýge bolatyny týraly egjeı-tegjeıli nusqaýlar ornalastyrylǵan.

Google Translate - mátin bóligin nemese veb-betti avtomatty túrde aýdarýǵa arnalǵan Google kompanııasynyń tegin veb-qyzmeti. Qazirgi kezde atalmysh qyzmet quramynda 64 til bar, biraq oǵan qazaq tili áli engizilmegen. Qazaq tilin Google Translate júıesine engizý úshin aǵylshyn, orys tilderinen qazaq tiline jáne atalǵan tilderge bizdiń tilimizden aýdarylǵan maqalalar sany belgili bir shekten asýy shart.