Qar tazalaýshylarǵa kómektesken kishkentaı pavlodarlyq kópshilikti súısindirdi

PAVLODAR. QazAqparat – Áleýmettik jelide Pavlodar qalasynyń kishkentaı turǵynynyń kúrekpen qardy tazalap jatqan áserli vıdeosy kópshilikti súısindirdi, dep habarlaıdy QazAqparat.

Vıdeoda kórsetilgendeı kommýnaldyq qyzmetkerlerge kúrekpen qar tazalap kómektesken 3 jastaǵy Adam Bondarenkoǵa Pavlodar qalasynyń ákimi Erjan Imanzaıpov oıynshyq syılady. Bul týraly ákim óziniń Instagram paraqshasynda jazdy.

«Birneshe kún buryn Instagram áleýmettik jelisindegi kishkentaı qala turǵynynyń kúrekpen qardy tazalap jatqan áserli vıdeosy jarııalanǵan bolatyn. Men de óz kezegimde Adamnyń ata-anasyna ulyna berip jatqan tárbıesi úshin shyn júrekten alǵysymdy aıtamyn. Elimizdiń bolashaǵy osyndaı eńbekke qushtar búldirshinderdiń qolynda ekenine senimdimin», - dedi ol.

Qazaqstandyqtar jelide balanyń eńbekqorlyǵyn erekshe baǵalap jazba qaldyrdy.