Qar tazalaý boıynsha merdigerlik uıymdardyń jumystary qanaǵattandyrmaıdy - Astana qalasynyń ákimi
ASTANA. QazAqparat - Búgin Astana qalasy ákimi Ádilbek Jaqsybekovtyń tóraǵalyǵymen ótken kezekti apparattyq keńeste qala basshysy aýdan ákimderi men óziniń orynbasarlarynyń nazaryn bıýdjettik qarjyny ıgerýge aýdardy, dep habarlady elorda ákimdiginiń baspasóz qyzmetinen.
Aldaǵy bıýdjetti sapaly josparlaý úshin barlyq basshylar jeke jaýapty ekendigin atap ótken ákim Memleket basshysynyń Qazaqstan halqyna Joldaýy aıasynda bıýdjet qarjysyn eń aldymen turǵyndardyń ómiri men elordanyń ınfraqurylymyn jaqsartýǵa baǵyttap, osy jumystardy joǵary deńgeıde júrgizýdi tapsyrdy.
Keńeste elordany damytý máseleleri sóz boldy. Qalanyń qarqyndy damýy men keńeıýin nazarǵa ala otyryp, Astananyń mártebesin retteıtin zańnamaǵa ózgerister men tolyqtyrýlar engizý kerek. Sonymen qatar Á.Jaqsybekov Qurylys basqarmasynyń bilim nysandaryn tapsyrý merzimderin júıeli buzatynyn atap ótti. Ótken jyly 3 jańa mektepti paıdalanýǵa berý josparlanǵan bolatyn, sonyń ishinde bireýi ǵana (№71 mektep) ashyldy. Qala basshysynyń aıtýynsha, buǵan memlekettik organdar taraptarynan júıeli tásildiń, monıtorıngtiń, ózara árekettesýdiń jáne baqylaýdyń bolmaýy sebep. - Búginde bireý qurylys júrgizse, basqalary ınjenerlik jeliler tartýy kerek. Biraq bul jasalmaı jatyr. Salynyp jatqan nysandardyń mańaıyna kólikpen de, jaıaý da jolaı almaısyń, - dedi qala basshysy. Astana ákimi taǵy da qala turǵyndarynyń ótinish-tilekterine tolyǵyraq toqtalyp ótti. Onyń atap ótýinshe, árbir aryz oryndaýshylar úshin birinshi kezekte turýy kerek. - Elorda turǵyndarynyń máselelerin qaǵazdaǵy shyǵarmashylyqqa aınaldyrýdyń qajeti joq. Bizdiń basty maqsatymyz qala turǵyndarynyń árbir máselesin naqty sheshý, tek osylaı ǵana halyqtyń senimine kirip, jaqsy basshy bola alamyz, - dedi ol.
Ótken aptada elorda ákimi qar qursaýlaryn tazartý úshin qosymsha jumys kúshi men tehnıkany tarta otyryp, aýa raıynyń ózgerýine daıyn bolýdy tapsyrǵan bolatyn. - Qar tazalaý tásili ózgermegen. Tehnıka buryn belgilengen marshrýt boıynsha júredi. Tańerteń keıbir kóshelermen júrý múmkin emes. Jalpy, qar tazalaý boıynsha merdigerlik uıymdardyń jumystary qanaǵattandyrmaıdy, - dedi Astana ákimi. Elorda ákimi jylý energııasymen qamtamasyz etetin kompanııalardyń basshylaryna elektr energııasy men sý berýdi josparly ajyratýlar boıynsha eskertý jasady. Á.Jaqsybekov bul tásilderdi TJ teńestirip, mundaı jaǵdaılardy boldyrmaýdy, qysqa daıyndyq jumystaryn kóktem-jaz maýsymynda júrgizýdi tapsyrdy. Keńes qorytyndysy boıynsha tıisti qurylymdardyń barlyq basshylaryna naqty tapsyrmalar berilip, ákimdiktiń baqylaýyna alyndy.
