Qar sýy qostanaılyqtardy ábigerge túsirýde
QOSTANAI. QazAqparat - Qostanaı qalasy tótenshe jaǵdaılar basqarmasynyń kezekshi bólimine qar sýynyń molaıýyna baılanysty ótken demalys kúnderi 25 qońyraý túsken, dep habarlaıdy QazAqparat tilshisi.
Qostanaıda salqyn aýa temperatýrasy saqtalǵanymen, kúndiz kúnniń jylynýyna baılanysty qar erip, turǵyndardy ábigerge túsirýde.
«Tek 31 naýryz ben 1 sáýir kúnderi turǵyndardan 25 habarlama aldyq. Olardyń barlyǵyna adam bólinip, arnaıy tehnıkalar jiberildi. Qar sýynan zardap shekken turǵyn úılerge qajetti qurylys materıaldary jetkizildi. «Áýejaı» shaǵyn aýdany men Halyqqa qyzmet kórsetý ortalyǵy mańyndaǵy avtokólik joldarynan sý júrip ketti. Merdigerlik uıymdar jedel qyzmet etti. Sý sorǵysh tehnıkalary jumyldyrylyp, sý jıylǵan aýmaqtarǵa ınertti materıaldar ákelindi», - dedi qalalyq TJ basqarmasyndaǵylar.
Vedomstvodan málim etilgendeı, osy kúnderi qalalyq ákimdikte tasqynǵa qarsy shtab quryldy. Turǵyndar 112 jáne 109 nómirlerine habarlasyp, qajetti aqparattaryn alady.
