Qar sýy Baıanaýyl-Pavlodar baǵytyndaǵy tas joldy buzyp ketti
ASTANA. QazAqparat - Baıanaýyl-Pavlodar baǵytyndaǵy tas jol erigen qardyń sýynan opyrylyp tústi, dep habarlaıdy pavlodarnews.kz oblystyq tótenshe jaǵdaılar departamenti bastyǵynyń orynbasary Abaı Temirbaevqa siltememen.
"Pavlodar men Baıanaýyl arasyndaǵy jol ýaqytsha jabyldy. Sebebi búgin tańǵy saǵat jeti kezinde Baıanaýyl aýdany Birlik aýyly mańyndaǵy joldyń astyndaǵy qubyrlar tasqyn sýdyń tebinine tótep bere almaı jarylyp ketken. Sý joldyń shamamen 30 metrdeı bóligin buzyp ótti. Oqys oqıǵa oryn alǵan jerge Pavlodardan jeti arnaıy tehnıka jetkizilip, jańadan qubyr ornatylyp jatyr. Ázirge tasqyn sýdyń beti áli qaıtqan joq. Sondaı-aq, topyraq tógilýde. Búgin túngi saǵat on ekiden bastap Pavlodar-Baıanaýyl baǵytyndaǵy baılanys qaıta qalpyna keledi", - deıdi Abaı Temirbaev.
Aıta keteıik, qazirgi tańda tótenshe jaǵdaı oryn alǵan óńirde oblys ákiminiń birinshi orynbasary Dúısenbaı Turǵanov bastaǵan jumys toby jaǵdaıdy jiti baqylaýda. Oblystyq tótenshe jaǵdaılar departamentiniń mamandary men «Qazavtojol» AQ Pavlodar fılıalynyń ókilderi de sol jerde jumys júrgizýde.
