Qar, sýyq klımat, qolaıly jattyǵý: Tennısten Monako quramasy Qazaqstanǵa keldi

ASTANA. KAZINFORM – Tennısten Monako ulttyq quramasynyń oıynshysy, belgili sportshy Valanten Vashro Qazaqstandaǵy jattyǵý jaǵdaılaryn joǵary baǵalap, álemdik tennıste básekelestik deńgeıiniń ósip kele jatqanyn atap ótti.

– Keremet jaǵdaı jasalǵan. Biz kún saıyn jattyǵyp jatyrmyz. Bul meniń mansabyma jaqsy áser etedi dep oılaımyn, - dedi V.Vashro elordada ótken baspasóz máslıhatynda.

Tennısshi jergilikti klımatqa da úırengenin aıtty.

– Men qardy jaqsy kóremin. Teńizge qaraǵanda taýdyń aýa raıy janyma jaqyn. Árıne, munda qatty sýyq. Biz syrtta kóp júrmeımiz, biraq maǵan osyndaı tabıǵat kórinisi unaıdy, - dedi ol.

V. Vashro Shanhaı týrnırindegi tabysty oıynynan keıingi formasy týraly suraqtarǵa jaýap berdi. Ol sondaı-aq ótken jeńisterine basa mán bermeıtinin jetkizdi.

– Ár matchtyń óz ereksheligi bolady. Túrli jańa oqıǵalarǵa kezigesiń. Jeńis sportshynyń boıyna senimdilik uıalatady. Biraq alańǵa 100 paıyz jeńemin dep oılap shyqpaǵan jón, - dedi ol.

Sonymen birge, ol qazirgi zamanǵy tennıstegi ózgeristerge toqtalyp, oıynshylar arasyndaǵy aıyrmashylyqtyń azaıǵanyn atap ótti.

– Búginde TOR-10, TOR-50 nemese TOR-100 oıynshylary arasynda aıtarlyqtaı aıyrmashylyq joq. Tipti 300 nemese 400-shi oryn alǵan oıynshylar da dál solaı tyrysady. Aıyrmashylyq burynǵyǵa qaraǵanda áldeqaıda azaıdy, - dedi Monako qurama komandasynyń oıynshysy.

Óz kezeginde Monako quramasynyń kapıtany Gııom Kýııar komanda joǵary dárejeli qarsylastarmen oınaýǵa daǵdylanyp jatqanyn, bul ulttyq quramanyń deńgeıin kóterýge yqpal etetinin aıtty. 

Eske sala keteıik, 6-7 aqpan kúnderi Astanada tennısten Devıs kýbogy irikteý kezeńiniń matchtary ótedi. Onda Qazaqstan óz alańynda Monako komandasyn qabyldaıdy. Oıyndar Astana qalasyndaǵy Beeline Arena ulttyq tennıs ortalyǵynda ótedi. 

Óz alańynda ótetin matchtarǵa Qazaqstan quramasy barynsha myqty qurammen shyǵady. Elordalyq kortta Aleksandr Býblık, Aleksandr Shevchenko, Beıbit Juqaev, Tımofeı Skatov, Dmıtrıı Popko jáne Denıs Evseev óner kórsetedi.

Qazirgi tańda Qazaqstan erler quramasy Davis Cup Nations Ranking reıtınginde 31-orynda tur. Al Monako quramasy 44-satyǵa jaıǵasqan.

Sondaı-aq Qazaqstan tennısten álemdegi úzdik elderdiń qataryna endi.