Qar men tuman: TJD Almaty oblysynyń júrgizýshilerine eskertý jasady

QONAEV. KAZINFORM – 23 qańtar kúni saǵat 08:00-den 20:00-ge deıin Almaty oblysynda qalyń qar jaýýy múmkin.

Aýa raıynyń qolaısyzdyǵyna baılanysty Almaty oblysy tótenshe jaǵdaılar departamenti turǵyndardan, týrısterden jáne júrgizýshilerden qaýipsizdik sharalaryn saqtaýdy surady. Onyń ishinde: taýǵa shyǵýdan ýaqytsha bas tartý, alys jolǵa shyqpaý, aýa raıy jaǵdaıyn baqylaý jáne tótenshe jaǵdaı týyndaǵan kezde 112 nómirine habarlasý.

Aýa raıyna baılanysty QazAvtoJol ulttyq kompanııasy da júrgizýshilerge eskertý jasady.

- Almaty oblysynda 23 qańtar kúni kún buzylýy yqtımal. Qar jaýyp, aýa temperatýrasy tómendeıdi. Túngi ýaqytta qatty aıaz bolýy múmkin. Keı aımaqtarda qalyń tuman túsip, burqasyn soǵady. Joldarda kóktaıǵaq paıda bolady dep boljanady, - dep habarlady kompanııadan.

QazAvtoJol qolaısyz aýa raıy saldarynan jol qozǵalysy qıyndaýy múmkin ekenin eskertip, jol qyzmetteri kúsheıtilgen rejımde jumys isteıtinin málimdedi. Jol jaǵdaıyna turaqty túrde monıtorıng júrgizilmek.

- Júrgizýshilerden múmkindiginshe alys saparǵa shyqpaýdy suraımyz. Sapardy aldyn ala josparlap, jolǵa shyqqan jaǵdaıda jyldamdyqty asyrmaı, araqashyqtyqty saqtaýǵa jáne jol qozǵalysy erejelerin qatań ustanýǵa shaqyramyz. Jolda tótenshe jaǵdaı týyndaǵan jaǵdaıda 1403 nómirine habarlasýlaryńyzdy suraımyz, - delingen habarlamada.

Eske salaıyq, ótken aptada Almatyda 15 santımetrden astam qar jaýdy.