Qar men daýyl: Almaty qutqarýshylary turǵyndardy taýǵa barmaýǵa shaqyrdy

ALMATY. KAZINFORM – Erteń, 5 naýryz kúni Almatynyń taýly aımaqtarynda qatty jel, tuman jáne kóktaıǵaq bolady dep boljanyp otyr.

Almaty qalasy tótenshe jaǵdaılar departamenti «Qazgıdromet» boljamyna súıene otyryp, kólik júrgizýshileri men jaıaý júrginshilerdi kóktaıǵaq kezinde erekshe muqııat bolýǵa jáne qaýipsizdik sharalaryn qatań saqtaýǵa shaqyrdy.

- 5 naýryzda Medeý jáne Bostandyq aýdandarynyń taýly aımaqtarynda qatty qar jaýyp, ońtústik-shyǵystan soǵatyn jel ekpini sekýndyna 18–23 metrge deıin jetedi, kúndiz keı ýaqytta 28 m/s deıin jetýi múmkin. Sondyqtan taýly aımaqtarǵa barmaýdy suraımyz, - dep habarlady departamentten.

Sonymen qatar TJD qala turǵyndaryna kólikti aǵashtyń astynda qaldyrmaý kerek ekenin eskertti.

Qatty jel kezinde múmkindiginshe úı-jaıda bolyńyz. Eger úıde bolsańyz, terezeler men esikterdi myqtap jabyńyz. Aýladan, ashyq balkondardan jáne lodjııalardan úıińizge zııan keltirýi múmkin turmystyq zattardy alyp tastańyz. Dalada bılbordtardyń, aǵashtardyń astynda, aıaqtalmaǵan ǵımarattarda, sondaı-aq úılerdiń qabyrǵalarynda jasyrynýǵa bolmaıdy, - dep túsindirdi TJD.

Eske salaıyq, Qonaev qalasynda 27 m/sek jyldamdyqpen jel soǵyp, onyń saldarynan turǵyn úılerdiń shatyry ushty jáne jeńil konstrýktsııalarǵa zaqym keldi.

Odan bólek Alataý qalasynyń ár aýmaǵynda qatty jelden ınfraqurylym zaqymdandy.