Qar qursaýynda qalyp qoıǵan adamdar qutqaryldy - Qostanaı
QOSTANAI. QazAqparat - Qostanaı oblysynda qutqarýshylar kóligimen qarǵa maltyqqan adamdardy shyǵaryp aldy, dep habarlaıdy QazAqparat oblystyq TJD Memlekettik til jáne aqparat tobyna silteme jasap.
«Oqıǵa osy jyldyń 2 aqpanynda 01:25 saǵatta «Qostanaı - Áýlıekól» avtojolynyń segizinshi shaqyrymynda, Qostanaı aýdany aýmaǵynda Osınovka kentiniń mańynda bolǵan. VAZ 2110 markaly jeńil avtokólik júrgizýshisi kólikti basqara almaı, joldan shyǵyp ketip, qalyń qarǵa kirip ketken. Avtokólik quralynyń salonynda 3 adam bolǵan. Olarǵa qutqarýshylar kómekke keldi», - deıdi vedomstvonyń ókilderi.
Qutqarýshylar avtokólik akkýmýlıatoryn ajyratyp, súıregish trostyń kómegimen avtomobıldi qar qursaýynan joldyń tazartylǵan ýchaskesine alyp shyqty.
Qazaqstan Respýblıkasy ІІM TJK Soltústik óńirlik aeroutqyr jedel-qutqarý jasaǵynyń qyzmetkerleri avtokóliktiń tehnıkalyq aqaýly kúıde bolǵandyǵynan, ony jaqyn mańdaǵy eldi mekenge qaraı súırep apardy. Qazirgi ýaqytta qutqarylǵan azamattardyń ómirine esh qaýip joq.
