Qar kóshkini qaýpine baılanysty Bogdanovıch muzdyǵynda shekteý kúsheıtildi

ALMATY. KAZINFORM – Qar kóshkini qaýpiniń joǵary deńgeıde saqtalýyna baılanysty Kishi Almaty ózeni alabynda ornalasqan Bogdanovıch muzdyǵy men «Shymbulaq» kýrorttyq aımaǵynda belgilengen shekteýlerdi saqtaý qajet. Bul týraly «Іle-Alataýy» memlekettik ulttyq tabıǵı parki habarlady.

Ulttyq parktiń málimetinshe, Bogdanovıch muzdyǵy erekshe qorǵalatyn tabıǵı aýmaqqa jatady jáne qoryqtyq rejım qoldanylatyn ekologııalyq turaqtandyrý aımaǵynda ornalasqan.

Qazaqstan Respýblıkasynyń «Erekshe qorǵalatyn tabıǵı aýmaqtar týraly» zańynyń 45-babyna sáıkes, bul aýmaqta retteletin ekologııalyq týrızmnen ózge sharýashylyq jáne rekreatsııalyq qyzmet túrlerine tyıym salynady.

– Meteorologııalyq jaǵdaıdyń qolaısyzdyǵyn, qar jamylǵysynyń qalyńdyǵyn jáne kóshkin qaýpi bar ýchaskelerdiń bolýyn eskere otyryp, atalǵan aýmaqtarda týrıster men azamattardyń júrýi olardyń ómiri men densaýlyǵyna qaýip tóndirýi múmkin, - delingen habarlamada.

Ulttyq park ókilderiniń málimetinshe, bul sharalar tótenshe jaǵdaılardyń aldyn alýǵa jáne azamattardyń qaýipsizdigin qamtamasyz etýge baǵyttalǵan.

Eske salaıyq, buǵan deıin 23 qańtar kúni saǵat 08:00-den 20:00-ge deıin Almaty oblysynda qalyń qar jaýýy múmkin ekenin habarlaǵanbyz.

Almaty oblysy Tótenshe jaǵdaılar departamenti turǵyndarǵa, týrısterge jáne júrgizýshilerge qaýipsizdik sharalaryn saqtaýdy eskertti.