Qar kóshkini qaýpi bar: ShQO-daǵy tasjolda kólik qozǵalysyna tyıym salyndy

ÓSKEMN. KAZINFORM – Shyǵys Qazaqstan oblysy Katonqaraǵaı aýdanynda qar kóshkini qaýpine baılanysty joldardyń biri jabyldy.

ShQO Tótenshe jaǵdaılar departamenti baspasóz qyzmetiniń málimetine súıensek, Katonqaraǵaı aýdanyndaǵy jergilikti mańyzy bar «Sogornoe-Barlyq» tasjolynyń 1-25 shaqyrymy jabyldy. 

- Atalǵan jol ýchaskesinde 9 naýryz saǵat 08.00-ge deıin kóliktiń barlyq túri úshin qozǵalysqa tyıym salyndy. Kólik júrgizýshilerin óz marshrýttaryn aldyn ala josparlap alýdy suraımyz. Osy rette, turǵyndarǵa barynsha abaı bolýdy, eshbir jaǵdaıda taýǵa shyqpaýdy eskertemiz. Eger qandaı da bir qıyndyqqa tap bolsańyzdar birden «112» nómirine qońyraý shalyńyzdar, - dep habarlady vedomstvo ókilderi.

Sondaı-aq qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.

Eske salsaq, osyǵan deıin Shyǵys Qazaqstan oblysynda jasandy jolmen qar kóshkini túsirilgeni habarlanǵan.