Qar kóshkini qaýpi bar: ShQO-da taǵy da joldar jabyldy

ÓSKEMEN. KAZINFORM – Shyǵys Qazaqstan oblysynda qar kóshkini júrý qaýpine baılanysty eki jol jabyldy.

Oblystaǵy eki tasjoldy qar kóshkini jaýyp qalý qaýpi týyndap otyr.

«Búgin saǵat 20.00-den bastap respýblıkalyq mańyzy bar „Óskemen-Altaı-Úlken Naryn-Katonqaraǵaı-Rahman qaınary“ tasjolynyń 6-166 shaqyrymynda (Ýshanov kenti men Altaı qalasyna deıingi aralyqta) jáne „Óskemen-Tarǵyn-Samar“ tasjolynyń 88-145 shaqyrymynda (Joǵary Taıynty men Samar aýylynyń aralyǵy) kóliktiń barlyq túri úshin qozǵalysqa tyıym salyndy» dep habarlady ShQO tótenshe jaǵdaılar departamentiniń baspasóz qyzmeti.

Osy rette qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.