Qar kóshkininen zardap shekken sarbazdardyń jaǵdaıy birqalypty - mınıstr Birtanov
ASTANA. QazAqparat - QR Densaýlyq saqtaý mınıstri Eljan Birtanov Kóksaı shatqalynda qar kóshkininen jaraqat alǵan sarbazdardyń qazirgi xal-jaǵdaıy týraly aıtyp berdi , dep habarlaıdy QazAqparat tilshisi.
Mınıstrdiń aıtýynsha, qazirgi kezde 10 sarbaz aýrýxanada em alyp jatyr. «Olardyń xal-jaǵdaıy oıdaǵydaı, densaýlyqqa qaýip tónip turǵan joq. Aýrýxanadan qaı kezde shyǵaratynyn dárigerler ózderi sheshedi. Eki sarbazdy Almatyǵa aýystyrǵan bolatyn. Jaǵdaılary jaqsarǵanda shyǵarady. Negizi, ómirge eshqandaı qaýip tónip turǵan joq», - dedi Birtanov búgin Úkimette ótken baspasóz máslıxatynda.
Aıta keteıik, Jambyl oblysyndaǵa Kóksaı shatqalynda jattyǵý ótkizgen 91678 áskerı bólimshesiniń sarbazdary kenetten qar kóshkinine tap boldy. Tótenshe jaǵdaıdyń saldarynan 7 sarbaz qaıtys boldy. 16-sy san alýan jaraqattar aldy. Búgin atalǵan oqıǵany arnaıy úkimettik komıssııa tergep jatyr.
