Qar kóshkininen mert bolǵan sarbazdarǵa qatysty sot bastaldy
ShYMKENT. QazAqparat - Jambyl oblysyndaǵy qar kóshkininiń astynda qalǵan sarbazdar ólimine qatysty sot otyrysy bastaldy. Shymkent garnızonynyń áskerı sotynda qaıǵyly jaǵdaıǵa kináli retinde maıor Baqyt Shoıbekovtyń isi qaralýda, dep habarlaıdy QazAqparat HAA tilshisi.
Sotta belgili bolǵandaı, aıyptalýshy Jambyl oblystyq 91 678 áskerı bóliminiń shtab bastyǵy qyzmetin atqarǵan. Qaıǵyly jaǵdaı oryn alǵan kúni áskerı bólimniń komandıri qyzmettik is saparǵa ketýine baılanysty basshylyq mindet osy laýazym ıesine júktelgen. Alaıda Baqyt Shoıbekov aýa raıynyń borandy bolýyn eskermesten, 15 sarbazdyń Kóksaı shatqalyndaǵy kezekti jattyǵýǵa shyǵyp ketýine jol bergen dep aıyptalýda. Sot otyrysyna aıyptalýshy áskerı qorǵaýshysymen keldi. Qazir ol kepil retinde bosatylyp, sotqa qatynap júr.
Eske salaıyq, 16 aqpanda 91 678 áskerı bóliminiń 7 sarbazy Jambyl oblysy Jýaly aýdanyndaǵy Kóksaı shatqalynda josparly áskerı daıyndyq júrgizý barysynda qar kóshkininiń astynda qalyp kóz jumǵan edi. Olardyń denesin 5 saǵattan keıin qazyp alynǵan. Al, denesi úsip qalǵan 8 sarbaz qutqarylǵan bolatyn.
Sotta aıyptalýshy retinde sóılegen Ońtústik aımaǵynyń áskerı prokýrory Ermek Janataev taýdaǵy kezekti jattyǵýlar tek 20-shy aqpannan bastalýy kerek bolǵan edi dep atap ótti.
«Taý shatqalyndaǵy jattyǵýlar áskerı bólim komandıri maıor Marat Bralınov bekitken jospar boıynsha 20 aqpannan bastalýy kerek bolǵan. Alaıda sarbazdar ol jerge kórsetilgen merzimnen buryn shyǵyp ketken. ıAǵnı, maıor Shoıbekov sarbazdardyń arnaıy jattyǵýǵa talapqa saı kúni shyǵýyn, olardyń jattyǵý kezinde saqtyq sharalaryn qoldanýyn qadaǵalamaǵan. Áskerlerdiń óliminiń, jaraqat alýynyń aldyn almaǵan. Ol óziniń qyzmetine nemquraıly qaraǵany úshin aıyptalyp otyr», - dedi áskerı prokýror Ermek Janataev.
Sot otyrysy kezinde áskerı bólimnen kelgen ókil qaıǵyly jaǵdaı bolǵan kúni joǵalǵan múlikter men qarýlardyń qaıtarylýyna baılanysty, áskerı bólimniń múliktik daýy joq ekenin aıtty. Jáne atalǵan áskerı bólimniń ofıtserlik quramy isti qarap jatqan sýdıa Gýlmıra Ýsmanovadan aıyptalýshyǵa bas bostandyǵynan aıyrý jazasyn qoldanbaý jóninde ótinish túsirgenin jetkizdi.
Іsti qaraý kezinde aıyptalýshy óziniń kinásin tolyǵymen moıyndady. Onyń sebebin, komandırdiń mindetin atqarýshy retinde áskerı bólimdegi barlyq jaǵdaıdy tolyq qadaǵalaı almaǵandyǵymen túsindirdi.
Sonymen qatar Baqyt Shoıbekov isti qaraýshy sýdıadan úkim shyǵarar kezde óziniń buǵan deıingi minsiz qyzmetin, qaraýynda eki perzenti men egde jastaǵy anasynyń, múgedek baýyrynyń bar ekendigin eskerýdi surady.
Kelesi sot otyrysy 21 tamyzǵa belgilendi.
