Qar kóshkini júrýi múmkin: ShQO-da taǵy da jol jabyldy

ÓSKEMEN. QazAqparat – Shyǵys Qazaqstan oblysynda qar kóshkini júrý qaýpine baılanysty tasjoldardyń biri jabyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, respýblıkalyq mańyzy bar «Óskemen-Altaı-Úlken Naryn-Katonqaraǵaı-Rahman qaınary» tasjolynda qar kóshkini júrý qaýpi artty.

«Soǵan oraı búgin saǵat 20.00-den bastap atalǵan joldyń 430-450 shaqyrymynda kóliktiń barlyq túrleri úshin qozǵalysqa tyıym salyndy. Óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes beremiz», - delingen aqparatta.

Esterińizge sala keteıik , osyǵan deıin ShQO-daǵy tasjol mańynda jasandy jolmen 4 ret qar kóshkini túsirilgen bolatyn.