Qar kóshkini: ShQO-da turǵyndarǵa qaýip tóndiretin ýchaskeler anyqtaldy
ÓSKEMEN. QazAqparat – Shyǵys Qazaqstan oblysyndaǵy 497 ýchaskede kóshkin júrý qaýpi bar, dep habarlaıdy QazAqparat tilshisi.
«Qazseldenqorǵaý» fılıalynyń baqylaýshylary júrgizgen monıtorıng nátıjesinde qar kóshkini qaýpi bar ýchaskelerde 70 santımetrdeı qar jınalǵany belgili boldy. Soǵan oraı departament ókilderi oblystyq mańyzy bar tasjoldarda kóshkinniń aldyn alý boıynsha tıisti sharalardy qolǵa aldy.
«Bıylǵy qys kezinde «Óskemen-Taýly Úlbi-Severnoe», «Óskemen-Altaı», «Óskemen-Samar» tasjoldarynda qar kóshkini túsirildi. Júrgizilgen 10 jarylystyń nátıjesinde 4470 tekshe metr qar túsirilgen. Búginde Shyǵys Qazaqstanda qar kóshkini qaýpi bar ýchaskeler sany – 497. Olardyń 336-sy obektiler men turǵyndarǵa qaýip tóndiredi», - deıdi «Qazseldenqorǵaý» ShQ fılıalynyń dırektory Omar Duzǵymbaev.
Onyń aıtýynsha, qys kezeńinde qar kóshkini boıynsha táýlik boıy monıtorıng júrgiziledi. ShQO TJD mamandary turǵyndarǵa qar jaýǵannan keıin 3-5 táýlik ishinde taýǵa barýdan bas tartýǵa keńes beredi.
«Kóshkin qaýpi bar ýchaskeden avtomobılmen ótip bara jatsańyz toqtamańyz. Asa qajettilik bolmaǵan jaǵdaıda, taýǵa barýdan aýlaq bolyńyz. Eger sizge qutqarýshylardyń kómegi qajet bolsa 112 nómirine habarlasa alasyz», - dep habarlady ShQO TJD.
