Qar, kóktaıǵaq, boran: aldaǵy úsh táýlikke arnalǵan aýa raıy boljamy

ASTANA. KAZINFORM –  «Qazgıdromet» RMK aldaǵy úsh táýliktegi aýa raıy boljamyn jarııalady. 

Sınoptıkterdiń boljamynsha, taıaýdaǵy úsh táýlikte Qazaqstannyń batysyna, soltústik-batysyna jáne soltústik óńirlerine soltústik-batys tsıklon jyrasy áser etedi, osyǵan baılanysty: elimizdiń batysynda jańbyr men qar túrindegi jaýyn-shashyn, kóktaıǵaq qubylystary, al soltústik-batysynda jáne soltústiginde boranmen qar jaýady dep kútilýde. Respýblıkanyń qalǵan aýmaǵynda keń antıtsıklonnyń áserinen jaýyn-shashynsyz aýa raıy bolady. Respýblıka boıynsha tuman jáne jel 15-25 m/s kúsheıýi kútiledi.

Qazaqstannyń batysynda temperatýralyq fon kúndiz 2-10 gradýs jyly, soltústik-batysynda 5 aıaz-5 gradýs jyly, soltústiginde, shyǵysynda jáne ortalyǵynda 5 aıaz-2 gradýs jyly, ońtústiginde jáne ońtústik-shyǵysynda 5-15 gradýs jyly bolady dep kútiledi.