Karerlerdi zańsyz ıgerýdi toqtatý kerek - Májilis depýtaty

NUR-SULTAN. QazAqparat – Májilistiń jalpy otyrysynda depýtat Fahrıddın Qarataev karerlerdi zańsyz ıgerý jaǵdaıyna tosqaýyl qoıýdy surady, dep habarlaıdy QazAqparat tilshisi.

«Bas prokýratýranyń málimetinshe, sońǵy úsh jylda respýblıkada karerlerdi zańsyz ıgerýge baılanysty 303 qylmystyq quqyq buzýshylyq tirkelgen. Onyń ishinde Aqmola oblysynda 32, Almaty oblysynda - 39, Túrkistan oblysynda - 32, Shymkent qalasynda - 11, Pavlodar oblysynda -23, Shyǵys Qazaqstan oblysy boıynsha - 27, sondaı-aq basqa oblystarda osyndaı jaǵdaı tirkelgen. Mysaly Nur-Sultan qalasynyń mańynda 54 zańsyz karer anyqtalǵan, Jambyl oblysynda jer qoınaýyn óz betinshe qazǵandardyń 32-si tirkelgen. Búgingi tańda atalǵan máseleler ashyq kúıinde qalyp otyr», - dedi depýtat Úkimet pen Bas prokýrartýra atyna joldaǵan saýalynda.

Onyń paıymynsha, bul jaǵdaı azamattardyń narazylyǵyn týyndatady jáne birqatar jaǵdaılarda áleýmettik shıelenistiń sebebi bolyp jatady.

«Osylaısha, kóptegen óńirlerde keń taralǵan paıdaly qazbalardy – qıyrshyq tasty, qumdy, sazdy, qara topyraqty jáne olardyń basqa da túrlerin zańsyz óndirýdiń kóptegen faktileri baıqalady. Al qorshaǵan ortaǵa keltirilgen zalaldyń jalpy somasy mıllıardtaǵan teńgeni quraıdy. Budan basqa, lastanǵan aýanyń saldarynan halyq densaýlyǵynyń nasharlaýy, sondaı-aq zańsyz áreketterdiń saldarynan ınfraqurylymnyń buzylýy alańdatarlyq úrdis bolyp otyr», - dedi Fahrıddın Qarataev.

Osy oraıda depýtat karerler jumysynyń jaı-kúıine, qaýipsizdigine jáne zańdylyǵyna túgendeý júrgizý, karerlerdiń jumysyn zańnama talaptaryna sáıkes keltirý, karerlerge jáne jalpy paıdaly qazbalardy óndirýge jer bólý protsesiniń ashyqtyǵyn arttyrý usynysyn jasady.