Karer ıeleri sanıtarlyq normalardy buzyp otyr – Nurlan Noǵaev
Mańǵystaý aýdany Shetpe aýylynyń mańynda 29 qurylys tasy kareri bar. Qazirgi tańda onyń 11-i istep tur. Jergilikti turǵyndar karer ıeleriniń ekologııalyq talaptardy buzǵany jóninde birneshe ret shaǵymdanǵan. Másele óńirdegi jer qoınaýyn paıdalaný jáne karerlerdiń jumysyna arnalǵan otyrysta talqylandy.
«Ókinishke oraı, keıbir karer ıeleri sanıtarlyq normalardy buzyp otyr, mundaı faktiler bar. Aýdan ákimdigine karerden shyǵatyn barlyq joldarǵa baqylaýdy kúsheıtýdi jáne kólikterge shamadan tys júk tıelýine jol bermeýdi tapsyramyn. Barlyq menshik ıeleri ózderiniń jaýapkershiligin jáne qoldanystaǵy zańnamanyń talaptaryn, sonyń ishinde shańdy basý qajettiligin bilýi kerek. Karer ıeleriniń nemquraıly qaraýynan irgeles jatqan eldi mekenderdiń turǵyndary zardap shegip otyr. Sondyqtan, baqylaýdy kúsheıtý kerek»
, - dedi oblys ákimi Nurlan Noǵaev.
Mańǵystaý oblysy boıynsha ekologııa departamentiniń basshysy Rýslan Túkenovtiń aıtýynsha, toǵyz sýbektige qatysty jospardan tys tekserý júrgizilgen. Nátıjesinde 4 karer usaqtaý-suryptaý qondyrǵylarynyń qyzmetin sot tártibimen toqtatyp, olarǵa 30 mln teńge ákimshilik aıyppul salynǵan.
Sonymen qatar, kásiporyndardyń basshylaryna karerlerdegi shańdy basýǵa arnalǵan arnaıy sý qondyrǵylarymen jabdyqtaý tapsyrylǵan. Bul ádis shań kólemin 60-80% azaıtýǵa múmkindik beredi. Sondaı-aq, óndiris aýmaǵynyń ishki joldaryna asfalt tóseý jáne shań bolmaýy úshin avtokóliktiń dóńgelekterine sý seýip otyrýǵa nusqaý berilgen. Alaıda, búgingi kúnge deıin qoıylǵan barlyq talaptar oryndalmaǵan.
Aıta ketý kerek, respýblıka boıynsha áktas tek qana Mańǵystaý oblysynda óndiriledi. Áktas-ulýtastyń iri ken oryndary Qaramandybas, Jetibaı jáne Beıneýde shoǵyrlanǵan. Al qurylys tasynyń (şeben) ken oryndary Taýshyq, Shetpe aýyldarynyń mańynda ornalasqan.
Eske salsaq, Úkimet jer qoınaýyn paıdalanýshylarǵa berilgen kelisimsharttar men lıtsenzııalardy qaıta qarap jatqany jazylǵan edi.
