Qar, burqasyn jáne kóktaıǵaq – Aldaǵy úsh kúnge aýa raıy boljamy
NUR-SULTAN. QazAqparat – Sınoptıkter 7-9 qańtarǵa arnalǵan aýa raıy boljamyn jarııalady, dep habarlaıdy QazAqparat Qazgıdrometke silteme jasap.
«Qazaqstannyń ońtústik oblystaryna jyljyǵan tsıklon saldarynan jaýyn-shashyn (kóbinese jylbysqy qar), tuman, kóktaıǵaq jáne aýa temperatýrasynyń azdap tómendeýi kútiledi. Al respýblıkanyń basqa aımaqtary Reseıdiń Eýropalyq bóliginen kóshken atmosferalyq aǵyndardyń yqpalynda bolady, soǵan baılanysty keı jerlerde qar jaýyp, burqasyn bolady, batystan ekpinde jel soǵady jáne aýa temperatýrasynyń tómendeýi boljanýda», delingen habarlamada.
Kúnniń sýytýyna qaramastan aýa temperatýrasy klımattyq normadan joǵary bolady, tek ońtústikte jáne shyǵysta ortasha klımattyq norma jaqyn aýa temperatýrasy kútiledi.
