Qar, burqasyn, aıaz: demalys kúnderi aýa raıy qandaı bolady

ASTANA. KAZINFORM — «Qazgıdromet» RMQ 17–18 qańtarǵa arnalǵan aýa raıy boljamyn jarııalady.

Sınoptıkterdiń boljamyna saı, demalys kúnderi Sibir aýmaǵynda ornalasqan ortalyǵy bar keń aýqymdy antıtsıklon Qazaqstannyń soltústik jáne shyǵys óńirlerinde aıazdy aýa raıyn saqtap turady.

Al respýblıkanyń batysy men ońtústiginde aýa raıyna ońtústik tsıklon jáne onymen baılanysty atmosferalyq fronttyq bólikter áser etedi.

— Bul óńirlerde jaýyn-shashyn (negizinen qar túrinde), jaıaý burqasyn, jeldiń daýyldy deńgeıge deıin kúsheıýi, sondaı-aq kóktaıǵaq qubylystary túrindegi qolaısyz meteorologııalyq jaǵdaılar kútiledi, — delingen habarlamada.

17–18 qańtarda Túrkistan, Jambyl jáne Almaty oblystarynyń jekelegen aýdandarynda qatty jaýyn-shashyn boljanady.

Jańa aptanyń basynda respýblıkanyń soltústigine, soltústik-batysyna jáne ortalyǵyna kezekti soltústik-batys tsıklon yǵysyp, qar men burqasyn ákeledi, sondaı-aq atalǵan óńirlerde aýa temperatýrasynyń birtindep joǵarylaýy kútiledi. Respýblıka boıynsha tuman túsedi dep boljanady.

17 qańtarda eldegi qaı joldar jabyq ekenin myna siltemeden oqyńyz.