Qar, boran: «Almaty-Tashkent-Termez» trassasy jabyldy
TARAZ. QazAqparat - Jambyl oblysynda aýa raıynyń buzylýyna baılanysty kólik qozǵalysy shekteldi, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń málimetine silteme jasap.
Atap aıtqanda, búgin saǵat 16.30-dan bastap aýa raıynyń nasharlaýyna baılanysty (qar, boran, joldyń nashar kórinýi) «Almaty-Tashkent-Termez» avtojolynyń 160-238 shaqyrym aralyǵynda, ıaǵnı Kenen jáne Blagoveşenka kentteri arasyndaǵy ýchaskede avtokóliktiń barlyq túrleri úshin qozǵalysqa tyıym salyndy.
Eske salaıyq, búgin Jambyl oblysynda qatty daýyl soǵyp, saldarynan Taraz qalasynda nysandardyń jartysynan kóbi elektr jaryǵynan ajyratyldy, elektr tasymaldaý jelileri isten shyqty, kóptegen ǵımarattyń shatyry julynyp, aǵashtar qulady, avtomobılder búlindi.
Daýyl saldarynan qazirgi ýaqytta birqatar aýdan jaryqsyz jáne kógildir otynsyz otyr.
Osy ýaqytqa deıin qarly boranda jolda qalyp qoıǵan 26 adam qutqaryldy.Sondaı-aq búgin Túrkistan oblysynda boran saldarynan 44 eldi meken jaryqsyz qalyp, joldar jabyldy.
Budan bólek, Shymkent qalasynda 23 baǵyt boıynsha elektr energııasyn berý toqtatyldy. Mektepter onlaın oqýǵa aýystyryldy.
